Washi News : थंडीची चाहूल लागताच बाजारात विविध हंगामी फळे येऊ लागतात. सध्या बाजारात हिरव्या-तांबूस रंगांची लहान-मोठ्या आकारातली बोरे दिसत आहेत.

यामध्ये आकाराने मोठे आणि चकचकीत हिरव्या रंगाच्या ॲपल बोरांना ग्राहकांकडून मागणी आहे. सध्या वाशीच्या एपीएमसी फळ बाजारात चमेली, उमराणा, कडाका यांच्यासोबतच ॲपल बोरेदेखील दाखल होण्यास सुरुवात झाली आहे.

शुक्रवारी एपीएमसीत २२० क्विंटल बोरांची आवक झाली, ज्यामध्ये ॲपल बोरांची आवक ही जवळपास १०० ते १५० क्विंटल असल्याची माहिती व्यापाऱ्यांनी दिली. सध्या सोलापूर, पंढरपूर या भागातून ॲपल बोरे दाखल झाली असून येत्या काही काळात गुजरातमधून बोरे बाजारात येतील, असे व्यापाऱ्यांनी सांगितले.

ॲपल बोरांची वैशिष्ट्ये

साधारण जूनमध्ये ॲपल बोरांची लागवड करण्यात येते; तर नोव्हेंबरपर्यंत फळे पूर्णपणे परिपक्व होऊन काढणीस तयार होतात. ॲपल बोर हे चमेली आणि उमराणा बोरांवर कलम संकरित करून तयार केली जातात. चवीला अतिशय गोड आणि आरोग्यास उत्तम मानले जाते.