Pune News : हवामान बदलांचा फटका बसल्याने यंदा काश्मीर, हिमाचल प्रदेशच्या सफरचंदाचा हंगाम लवकर आटोपला. त्यामुळे बाजारपेठेतील सफरचंदाची मागणी लक्षात घेता, आयातदारांनी इराण आणि तुर्की येथील सफरचंद आयात करण्याचा निर्णय घेतला. यामुळे आता इराणच्या सफरचंदाचा हंगाम सुरू झाला आहे.

लाल, एकसारखा आकार, टिकाऊ आणि चवीला गोड अशा इराणच्या सफरचंदाला चांगली मागणी वाढली आहे. किरकोळ बाजारात या सफरचंदाला किलोस १५० ते १७० रुपयांपर्यंत दर मिळत आहे. आरोग्यासाठी सफरचंदाला वर्षभर मागणी असते. यंदा मात्र स्थानिक हिमाचल आणि काश्मीरचा हंगाम लवकर संपल्याने आयात सफरचंदाला मागणी वाढली आहे.

पुणे बाजार समितीमध्ये गरजेनुसार तुर्की, इराण, इटली, न्यूझिलंड, बेल्जियम, वॉशिंग्टन, चिली, पोलंड, स्पेन आदी देशांतून सफरचंदाची आवक होत असते. बाजारात सध्या इराण सफरचंदाचा हंगाम सुरू असून हा हंगाम नोव्हेंबर ते मार्च या कालावधीत असतो. तर, तुर्की सफरचंदाचा हंगाम जानेवारी ते एप्रिल दरम्यान असतो.

इराणच्या सफरचंदांची आवक चांगली वाढली असून, बाजारात दररोज इराणहून ५ ते ६ हजार क्रेट इतकी सफरचंदाची आवक होत आहे. घाऊक बाजारात दहा किलोच्या इराण सफरचंदाच्या क्रेटला ११०० ते १२०० रुपये भाव मिळत आहे. तुर्की सफरचंदाला १८ किलोच्या पेटीस २८०० ते ३२०० रुपये भाव मिळत आहे, अशी माहिती सफरचंदाचे आयातदार आणि आडते शिवजीत झेंडे यांनी दिली.

काश्मीर, हिमाचलच्या उत्पादनात घट

गेल्यावर्षी बर्फवृष्टी कमी झाल्याने काश्मीर, हिमाचल सफरचंदाचे उत्पादन निम्म्याने कमी झाले आहे. उत्पादन घटल्याने उत्तरेकडील राज्यात सफरचंदाची विक्री जास्त झाली. त्यामुळे यंदा पुण्याच्या बाजारपेठेत पन्नास टक्क्यांनी आवक कमी झाली. त्यातही फळाचा दर्जा फारसा चांगला नव्हता. त्यामुळे यंदा इराण सफरचंदाला मागणी असल्याचे आडते सुयोग झेंडे यांनी सांगितले.