Vegetable Market Update : गणेशोत्‍सवात बहुतांश भाविक शाकाहाराला प्राधान्य देत असल्‍याने भाज्यांची मागणी वाढली आहे. सध्या आवक कमी असल्‍याने स्‍थानिक भाज्‍यांनाही पसंती मिळत आहे. भाज्यांचे भाव किलोमागे ३० ते ५० रुपयांनी वाढले आहेत. कोथिंबीर जुडी १०० रुपयांना विकली जात आहे.

गणेशोत्सवासाठी मुंबई, ठाण्यातून आलेले चाकरमानी स्थानिक भाज्‍यांची खरेदी करताना दिसतात. आदिवासी बांधव डोंगर-दऱ्यांत रानभाज्‍यांची शेती करतात. यातून त्‍यांना चांगला मोबदलाही मिळतो.

भाज्यांचे भाव गत महिन्याच्या तुलनेत ३० ते ५० रुपयांनी वाढले असले तरी ग्राहक मोठ्या प्रमाणात खरेदी करत असल्‍याचे विक्रेत्‍या महिला सांगतात. सध्या सकाळी पेण येथील कृषी उत्पन्न समितीच्या बाजारपेठेत ग्राहकांची झुंबड होत आहे.

बाजारात वांगी ६० रुपये किलो, भेंडी ६०, टोमॅटो ५०, मटार २५०, मिरची ६०, गवार ६०, फरसबी ६०, फ्लॉवर ८० आदी भावाने सध्या विक्री होत आहे.

कोथिंबिरीची जुडी १०० रुपयांना असल्‍याने अनेकांच्या जेवणातून गायब झाली. पेण परिसरात भेंडी, शिराळे, कारली, काकडी व पालेभाज्यांची मोठ्या प्रमाणात लागवड केली जाते.