Hingoli News : देशातील हळदीची प्रमुख बाजारपेठ असलेल्या वसमत बाजार समितीत यंदा हळदीच्या दरात तेजी आली आहे. कमाल दराचे नवनवीन उच्चांक प्रस्थापित होत आहेत. शुक्रवारी (ता. ४) हळदीची २ हजार ३९४ क्विंटल आवक होऊन प्रतिक्विंटल किमान १२ हजार १०० ते कमाल ३० हजार रुपये तर सरासरी २१ हजार ५० रुपये दर मिळाले. वसमत बाजार समितीच्या इतिहासात सेलम वाणाच्या हळदीला मिळालेला हा सर्वोच्च कमाल दर आहे.

शुक्रवारी परभणी जिल्ह्यातील डिग्रस (ता. परभणी) येथील शेतकरी शेषराव भुजंगराव बोंबले यांच्या सुमारे ६ क्विंटल (११ कट्टे) हळदीला (हळद कांडी) प्रतिक्विंटल ३० हजार रुपये दर मिळाला.

गुरुवारी (ता.३) प्रतिक्विंटल किमान १० हजार ५९४ ते कमाल १६ हजार रुपये तर सरासरी १३ हजार १०५ रुपये दर मिळाले. मंगळवारी (ता.१) हळदीची ३२४९ क्विंटल आवक झाली. त्या वेळी प्रतिक्विंटल किमान ११२५० ते कमाल २०००० रुपये तर सरासरी १५६२५ रुपये दर मिळाले.

हिंगोली जिल्ह्यातील बाजार समित्यांमध्ये यंदा जूनपासून हळदीच्या दरात सुधारणा होत आहे. जुलैमध्ये कमाल दर २० हजारांवर पोहोचले. २० जुलै रोजी उच्चांकी कमाल २२ हजार रुपये तर १९ जुलै रोजी कमाल २० हजार रुपये दर मिळाले होते.

एप्रिलमधील अवकाळी पावसामुळे शेतात वाळवत घातलेली हळद भिजल्यामुळे मालाच्या दर्जावर परिणाम झाला. त्यामुळे सुरवातीला कमी दर मिळत होते. परंतु तेजीमुळे भिजलेल्या हळदीला आता १० हजार रुपयांवर दर मिळत आहेत.