Jalgaon News : देशात सध्या रोज सात ते आठ लाख क्विंटल कापसाची आवक होत आहे. दीड लाख क्विंटल गाठींची (एक गाठ १७० किलो रुई) निर्मिती रोज होत आहे. खाद्य तेलांच्या बाजारात नरमाई आल्याने सरकी दरात काहीशी घट मागील १५ ते १६ दिवसांत झाली आहे.

कापसाचे दर खानदेशात खेडा किंवा थेट खरेदीत ६८०० ते ७००० रुपये प्रतिक्विंटल आहेत. दर्जा व शेतकऱ्यांकडील साठा यानुसार दर दिले जात आहेत. काही शेतकऱ्यांना ७१०० रुपये प्रतिक्विंटलचाही दर मिळाला आहे.

खानदेशात सध्या कापसाची आवक तुलनेत कमी आहे. खानदेशात रोज २० ते २१ हजार क्विंटल कापसाची आवक होत आहे. मागील वर्षाच्या तुलनेत ही आवक खानदेशात बरी आहे. देशातही मागील वर्षाच्या तुलनेत कापसाची आवक अधिक आहे.

मागील वर्षी नोव्हेंबरमध्ये देशात रोज दोन ते अडीच लाख क्विंटल कापसाची आवक होती. यंदा ही आवक अधिक आहे. कारण कापूस बाजार यंदाही सुरवातीपासून संथ व अस्थिर दिसत आहे.

सरकीचे दर मागील महिन्यात ३३०० रुपये प्रतिक्विंटल होते. सध्या सरकीचे दर ३१०० रुपये आहेत. खंडीचे दर (एक खंडी ३५६ किलो रुई) ५५ ते ५६ हजार रुपये असे आहेत. सरकी दरात घट झाल्याने कापूस बाजार ६८०० ते सात हजार रुपये प्रतिक्विंटलवर स्थिरावरला आहे.

सरकीला खाद्यतेलाच्या बाजारात मागणी कमी आहे. सोयाबीन, मका यंदा मुबलक आहे. यामुळे पशुखाद्यासंबंधी सरकी ढेपेला चांगले व कमी दरातील पर्यायही बाजारात आहेत. यामुळे सरकीला उठाव कमी आहे.

कापूस महामंडळाचा आधार

देशात कापूस महामंडळ (सीसीआय) उत्तर भारतासह मध्य प्रदेश व तेलंगणात कापसाची बऱ्यापैकी खरेदी करीत आहे. ७०२० रुपये प्रतिक्विंटलचा दर सीसीआय कापसाला सरसकट सध्या देत आहे. यामुळे बाजार काहीसा स्थिर दिसत आहे. शासकीय हस्तक्षेपामुळे बाजारातील पडझड कमी झाल्याचा मुद्दाही जाणकार उपस्थित करीत आहेत.