कोल्हापूर : येथील बाजार समितीत (Kolhapur APMC) या सप्तहात वांगी, ओली मिरची व गवारीच्या दरात (Vegetable Rate) तेजी राहिली. भोगी व संक्रातीच्या (Makar Sankranti) पार्श्‍वभूमीवर गेल्या पंधरवड्याच्या तुलनेत या सप्ताहात बहुतांश भाजीपाल्याच्या दरात (Vegetable Market) तेजी राहिली.

दरात सुधारणा झालेल्या भाजीपाल्यामध्ये वांगी, टोमॅटो, ढोबळी मिरची, ओला वाटाणा व गवारीचा समावेश होता. वांग्यास दहा किलोस १०० ते ७०० रुपयांपर्यंत दर होता. वांग्याची आवक मोठ्या प्रमाणात घटल्याने वांग्यात चांगली मागणी राहिली.

वांग्याची केवळ ८० ते १०० बॉक्स इतकीच आवक राहिली. गवारीस दहा किलोस ५०० ते ८०० रुपये दर मिळाला. कारली, भेंडी, वरणा (पावटा), दोडका या भाज्यांना दहा किलोस १०० ते ४०० रुपयापर्यंत दर होता. संक्रातीच्या पार्श्‍वभूमीवर गाजराच्या दरातही सुधारणा होती. गाजरास दहा किलोस २०० ते ४५० रुपये दर मिळाला.

पालेभाज्यांमध्ये कोथिंबिरीस शेकडा ३०० ते ७०० रुपये दर होता. कोथिंबिरीची २५ ते ३० हजार पेंढ्या या सप्ताहात आवक झाली. कांदापात, मेथी, पालक, शेपू या भाज्यांना सरासरी शेकडा ५०० ते ७०० रुपये दर मिळाला. मेथीची सहा ते सात हजार पेंड्यांची आवक होती. भाजीपाल्यांची आवक १००० ते २००० पेंड्याच राहिली.

फळांमध्ये द्राक्षाची आवक सुरू झाली आहे. सांगली, सोलापूर भागांतून द्राक्ष बाजार समितीत येत आहेत. द्राक्षास प्रति बॉक्स १५० ते ३५० रुपये इतका दर मिळाला. रोज ५० ते १०० बॉक्स इतकी आवक झाली. बोरास किलोस १० ते ३० रुपये दर होता.