Akola News : बाजारपेठेत सोयाबीनचा किमान दर चार हजारांच्या आत पोचला असतानाच गेले अनेक दिवस १० हजारांवर विकत असलेली तूरचे दरही घसरले आहेत. बाजार समित्यांमध्ये तुरीचा सरासरी दर १० हजारांच्या आत उतरला आहे. काही ठिकाणी ९५०० पर्यंत दर मिळतो आहे.

नव्या हंगामाची सोयाबीन बाजारात येत असून विविध बाजार समित्यांमध्ये आवकेत मोठी वाढ झालेली आहे. सोयाबीनचा किमान दर चार हजारांपेक्षा कमी आहे. कमाल दरही ४६०० पर्यंत असला तरी सर्वच मालाला हा दर मिळत नाही. येथील बाजार समितीत सोयाबीन ४४०० पर्यंत सरासरी जात आहे.

हमीभावापेक्षा हा दर कमी आहे. सोबतच बाजारात आता तुरीच्या दरात झालेली घसरण चिंता वाढवणारी आहे. येथील बाजार समितीत मंगळवारी (ता. ८) तूर किमान ८५०० व कमाल १०,४७५ रुपये विकली. सरासरी दर ९८०० रुपये होता. आजवर तुरीचा सरासरी दर १० हजारांवर होता. काही महिन्यांपूर्वी तुरीचा दर ११ हजारांवर पोचला होता. नंतर कमी होत आता ९५०० हजारांपर्यंत आला आहे.

आठवडाभरात तुरीच्या दरात साधारणतः ५०० ते ७०० रुपये प्रतिक्विंटलपेक्षा अधिक घसरण झाल्याचे सांगितले जात आहे. गेले वर्षभर मिळालेले दर यंदाही टिकून राहतील, चांगले दर मिळणार असल्याची शक्यता पाहत शेतकऱ्यांनी या पिकाची लागवड वाढवली आहे. सर्वच जिल्ह्यांत तुरीची लागवड यंदा समाधानकारक झालेली आहे.

राज्यात तुरीची १२ लाख २३ हजार हेक्टरवर पेरणी झालेली आहे. अकोला जिल्ह्यात यंदा सरासरी ५५,५०८ हेक्टरच्या तुलनेत ६२,०७६, बुलडाण्यात ७९,२०८ हेक्टरच्या तुलनेत ८८,८०३ तर वाशीम जिल्ह्यात ५८,६१० हेक्टरच्या तुलनेत ६६,४३६ हेक्टरवर तुरीची लागवड झालेली आहे. या तिनही जिल्ह्यांत सरासरीपेक्षा अधिक हेक्टरवर पेरणी झालेली आहे. आता तुरीचा हंगाम दीड-दोन महिन्यांवर आलेला आहे. सध्या बाजारात मागील हंगामातील तूर येत आहे. नवीन तूर बाजारात दाखल झाल्यानंतर हा दर किती राहतो हे पुढील काळातच स्पष्ट होऊ शकेल.