Nagpur News : पणन मंडळाच्या अधिकाऱ्यांनी कृषी मंत्र्यासमोरच कानउघाडणी केल्यानंतर कळमना बाजार समितीद्वारे बाजार समितीच्या परिसरात काट आकारणी केली जाणार नाही, अशा आशयाचा फलक लावण्यात आला आहे. संत्रा बागायतदारांनी या संबंधी थेट कृषिमंत्र्यांकडे तक्रार केली होती. त्याची दखल घेत हा निर्णय घेण्यात आला असला तरी याची अंमलबजावणी कशी होणार याविषयी साशंकता व्यक्‍त केली जात आहे.

कळमना बाजार समितीत हंगामात २० लाख टन संत्रा-मोसंबीची खरेदी होते. या शेतकऱ्यांकडून प्रति टन १०० किलो याप्रमाणे काट आकारला जातो. शेतकऱ्यांनी विक्रीसाठी आणलेल्या संत्रा फळांमध्ये काही लहान आकाराची संत्रा फळे असल्याचे कारण देत हा काट (सूट) आकारला जातो. गेल्या अनेक वर्षांपासूनची ही लुटीची परंपरा कायम आहे. ही पद्धत बंद व्हावी याकरिता यापूर्वी देखील सातत्याने मागणी करण्यात आली.

पणन मंत्र्यांपर्यंत देखील हा मुद्दा उपस्थित करण्यात आला. मात्र त्याची दखल घेण्यात आली नाही. दरम्यान, आठवडाभरापूर्वी माजी आमदार आशिष देशमुख, आमदार देवेंद्र भुयार यांच्यासह ‘महाऑरेंज’चे संचालक मनोज जवंजाळ व इतर शेतकऱ्यांनी कृषिमंत्री धनंजय मुंडे यांची मुंबई मंत्रालयात भेट घेतली होती.

या वेळी झालेल्या बैठकीत संत्रा बागायतदारांच्या विविध समस्यांवर मंथन झाले. त्या वेळी काही शेतकऱ्यांनी कळमना बाजार समितीत आकारल्या जाणाऱ्या काटचा मुद्दा उपस्थित केला होता. या बैठकीला पणन विभागाच्या अधिकाऱ्यांची देखील उपस्थिती होती. त्यांनी बैठकीतूनच कळमना बाजार समिती प्रशासनाशी संपर्क साधत लुटीचा हा प्रकार थांबवावा, अशी सूचना दिली.

बाजार समिती प्रशासनाने देखील त्याची दखल घेत दि नागपूर फ्रूट डीलर असोसिएशनच्या पदाधिकाऱ्यांची बैठक घेत त्यामध्ये काट न आकारण्याचे निर्देश देण्यात आले. त्यानंतर फ्रूट डीलर असोसिएशनच्या पदाधिकाऱ्यांनी देखील काट घेणार नसल्याचे जाहीर केले आहे.

बाजार समितीत लागला फलक

बाजार समिती प्रशासनाच्या निर्देशानुसार फ्रूट डीलर असोसिएशनने काट घेणार नाही, असे जाहीर केल्यानंतर तसा फलकही बाजार समिती परिसरात लावण्यात आला आहे. शेतीमालाची ग्रेडिंग (प्रतवारी) झाल्यास कोणतेही वजनात काट राहणार नाही. जेणे करून शेतकरी बांधवांना रास्त भाव मिळेल, असा मजकूर यावर नमूद आहे.