Sindhudurg News: सिंधुदुर्ग जिल्ह्यात काजू बी आवक काही प्रमाणात वाढली असून, काजू बीच्या दरात किंचित घसरण झाली आहे. सध्या काजू बीचा दर प्रतवारीनुसार प्रतिकिलो १५५ ते १७० रुपयेपर्यंत आहे. प्रतिकिलो पाच रुपयांची घसरण झाली आहे.

जिल्ह्यात या वर्षी विलंबाने काजू हंगाम सुरू झाला. दुसऱ्या आणि तिसऱ्या टप्प्यांतील मोहर ८० टक्के करपला. त्याचा मोठा परिणाम उत्पादनावर झाला आहे. २० ते २५ टक्केच उत्पादनाचा अंदाज आहे. फेब्रुवारी अखेरीपासून हंगामाला गती आली असली, तरी १५ मार्चनंतर काजू बीची आवक वाढत असल्याचे चित्र आहे.

सुरुवातीला काजू बीला प्रतिकिलो १७५ रुपये दर मिळाला. काजू बीला प्रतवारीनुसार दर दिला जातो. यापूर्वी सरसकट काजू बीला प्रतिकिलो १६० ते १६५ रुपये दर दिला जात होता. तर वेंगुर्ला सात नंतरच्या काजू बीला १७० रुपये दर दिला जात होता. परंतु गेल्या आठवड्यात प्रतिकिलो पाच रुपयांची घसरण दरात झाली आहे.

सध्या सरसकट १६० रुपये दर दिला जात आहे. तर प्रतवारीनुसार १५५, १६० आणि १६५ असा दर दिला जात आहे. दरम्यान या वर्षी काजू बी उत्पादन कमी असल्यामुळे अनेक कारखानदार काजू बी थेट खरेदी करू लागले आहेत. कारखानदाराकडून शेतकऱ्यांना व्यापाऱ्यापेक्षा प्रतिकिलो पाच ते दहा रुपये दर दिला जात आहे. थेट बागेत जाऊन ही खरेदी केली जात आहे.