Jalgaon News : खानदेशात केळीची आवक घटली आहे. दरही कमाल १८०० रुपये प्रति क्विंटलवर स्थिर आहेत. दर्जेदार केळीला मागणी असून, केळीची पाठवणूक उत्तरेकडे अधिकची केली जात आहे.

दिवाळी सणामुळे अनेकांनी केळीची काढणी केली नाही. यातच केळीच्या आवकेत मागील सहा ते सात दिवसांत सतत घट झाली आहे. केळीला खानदेशात उठाव कायम आहे. सध्या प्रति क्विंटल १५०० ते १८०० व सरासरी १६०० रुपये प्रति क्विंटलचा दर केळीस खानदेशात आहे. मध्य प्रदेशातील बऱ्हाणपुरातही केळी दर कमाल १८०० रुपये प्रतिक्विंटलपर्यंत आहेत.

केळीची आवक खानदेशात सध्या प्रतिदिन ५० ते ५५ ट्रक (एक ट्रक १६ टन क्षमता) एवढी आहे. या आवकेत मागील सात ते आठ दिवसांत सुमारे आठ ते १० ट्रकने घट झाली आहे. बऱ्हाणपुरातही केळी आवक ९१ ते ९२ ट्रकवरून ७० ते ७५ ट्रक एवढी झाली आहे.

तेथे दोन ते १० टन क्षमतेच्या ट्रक, मालवाहू वाहनांतून केळीची आवक होते. तेथे एकूण आवक ५० ते ६० टन एवढीच राहिली आहे. दरात मात्र मोठी वाढ झालेली नाही. केळीदर वाढ करावी, असा मुद्दा शेतकरी उपस्थित करीत आहेत. कारण दर्जेदार केळी खानदेशात काढणीवर आहे. या केळीस उठावही आहे.

केळीची आवक मागील महिन्याच्या मध्यात प्रतिदिन सरासरी ७० ते ८० ट्रक एवढी होती. त्यात हळूहळू घट झाली आहे. केळी आवकेत आणखी २० ते २५ दिवस कोणतीही वाढ होणार नाही.

जळगाव जिल्ह्यात सध्या चोपडा, जामनेर, पाचोरा, भडगाव, चाळीसगाव, जळगाव, यावल या भागांत केळीची आवक अधिक आहे. तर रावेर, मुक्ताईनगर भागांत आवक कमी आहे. धुळे व नंदुरबारातही आवक अल्प आहे.