Banana Plantation : कांदेबाग केळीची लागवड सुरू

Jalgaon News : खानदेशात कांदेबाग केळी लागवड सुरू झाली आहे. यंदा लागवड किंचित वाढेल किंवा स्थिर राहील. पाऊस, मजूरटंचाई व नैसर्गिक समस्यांना तोंड देऊन शेतकरी ही लागवड यशस्वी करण्याची धडपड करीत आहेत.

यंदा खानदेशात सुमारे २० ते २५ हजार हेक्टरवर कांदेबाग बहरातील केळी बागांची लागवड होईल. ही लागवड सप्टेंबर अखेरीस किंवा ऑक्टोबरच्या मध्यात सुरू होते. परंतु बाजारातील दर, कंद, रोपे उपलब्धता व अन्य बाबी लक्षात घेऊन शेतकरी आगाप लागवडी करीत आहेत. परंतु खानदेशातील तापमान सध्या कमी आहे.

पण उकाडा, उष्णता आहे. मध्येच पावसाचे संकेत विविध संस्था देत आहेत. सणासुदीचा काळ आहे. असे असतानाही शेतकरी ही लागवड करीत आहेत. लागवडीसाठी केळी रोपे व कंदांचाही उपयोग केला जात आहे.

रोपांना क्रॉप कव्हर लावण्याची गरज नाही. कारण उष्णता अधिक नाही. पाऊस, ढगाळ वातावरण आदी समस्या खानदेशात सुरूच आहे. अशात रोहित्रांतील बिघाड, वीज बंद होणे आदी समस्याही तयार होत असून, यावर ट्रॅक्टरचलित जनित्राचा पर्यायही शेतकऱ्यांनी शोधला आहे.

खानदेशात कांदेबाग बहरातील केळी लागवडीसाठी जळगावातील जामनेर, चोपडा, यावल, जळगाव, पाचोरा, भडगाव, नंदुरबारमधील तळोदा व अक्कलकुवा हा भाग अग्रेसर आहे. अन्य भागातही कमी क्षेत्रात या कांदेबाग बहर केळीची लागवड केली जाते. यंदाची लागवडही स्थिर राहील. कारण शेतकरी कमी लागवडीत काटेकोर व्यवस्थापन करून अधिकाधिक उत्पादन घेण्याचा प्रयत्न करीत आहेत.

अनेक भागात पाणी आहे. परंतु वीज व्यवस्थित नसते. यामुळेदेखील कमी लागवड करून त्यात शेतकरी परिश्रम घेऊन कार्यवाही करीत आहेत. सर्वाधिक लागवड चोपडा भागात होईल. ही लागवड सुमारे आठ ते १० हजार हेक्टरवर अपेक्षित आहे. यापाठोपाठ यावल, जामनेर, पाचोरा, भडगाव, जळगाव आदी भागांत लागवड होईल. नंदुरबारातील तळोदा, अक्कलकुवा तालुक्यातही लागवड मागील तीन वर्षे सतत वाढली असून, तेथे दीड ते दोन हजार हेक्टरवर केळी लागवड अपेक्षित आहे.

धुळ्यातील शिरपूर तालुक्यातही लागवड एक हजार हेक्टरपेक्षा अधिक होईल, असा अंदाज आहे. केळी लागवडीसाठी कंद मुबलक आहेत. तसेच अनेक कंपन्या रोपांचाही पुरवठा करीत आहेत. रोपांचे दर स्थिर आहेत. १० ते १७ रुपये प्रतिरोप असे केळीच्या उतिसंवर्धित रोपांचे दर आहेत. मध्य प्रदेश, गुजरात व अन्य जिल्ह्यांतील कंपन्याही रोपांचा पुरवठा करीत आहेत. तसेच कंदांचे दरही वेगवेगळे आहेत. कंदांमध्ये ग्रॅण्ड नैन वाणाचा उपयोग अधिक होत आहे. अडीच, तीन, चार ते पाच रुपये प्रतिकंद असे कंदांचे दर आहेत.