Buldana News : स्थानिक कृषी उत्पन्न बाजार समितीत मक्याला मागणी असल्याने दरांमध्ये सुधारणा झाल्याचे दिसून येत आहे. आवक कमी असून सरासरी दर २३०० रुपयांवर पोहोचला आहे.

विदर्भात बुलडाणा जिल्ह्यात मक्याची सर्वाधिक लागवड होत असते. खरीप, रब्बी या दोन्ही हंगामांत या जिल्ह्यातील शेतकरी मक्याचे पीक घेतात. खरिपाचे नियोजित क्षेत्र २० हजार हेक्टरपर्यंत आहे. जिल्ह्यात उत्पादित होणाऱ्या बहुतांश मक्याची विक्री मलकापूर बाजारातून केली जाते.

प्रामुख्याने बुलडाणा, मोताळा, नांदुरा, मलकापूर तसेच खानदेशातीलही काही तालुक्यांतून याठिकाणी मका विक्रीला येत असतो. या ठिकाणी मक्याचे खरेदीदार अधिक असून बाहेरचेही व्यापारी मालाची खरेदी करीत असतात.

चांगल्या मक्याला दरही चांगला मिळतो. सोमवारी (ता. १) या बाजार समितीत आलेला मका कमाल २४७० रुपयांनी विकला गेला. किमान दर २२०० रुपये होता. सरासरी दरांचा विचार केला तर २३२० रुपये दर मिळाला. बाजारात आवक १०० क्विंटलच्या आत झाली होती.

नवीन हंगामाला अद्याप बरेच दिवस वेळ आहे. रब्बी, अर्धरब्बी हंगामात काढणी झालेला मका सध्या विक्रीला येत आहे. पेरण्यांच्या कारणाने बाजारात आवकेवर परिणाम झाला असल्याचे सांगण्यात आले.

तीळ विकतोय ११ हजारांवर

मलकापूर बाजार समितीत तिळाला ११ हजारांवर दर मिळतो आहे. तिळाचा कमाल दर ११६२५ तर किमान ११२५० रुपये मिळाला होता. सरासरी ११३०० रुपयांचा दर शेतकऱ्यांना मिळाला. बाजारात तिळाची सहा पोते आवक झाली होती.