Kolhapur News : काजू बीची येथील बाजारपेठेत आवक सुरू झाली आहे. शुक्रवारच्या (ता. ५) आठवडा बाजारात एक टन काजू बीची आवक झाली. महिना अखेरीस बाजारपेठेत काजू बीची उलाढाल वाढणार आहे. दराबाबत शेतकऱ्यांत अजूनही संभ्रम आहे. काजू बीला प्रतिकिलो ९० रुपये दर मिळाला मात्र शेतकऱ्यांना जादा दर मिळण्याची अपेक्षा आहे.

मार्च महिना संपला तरी बाजारपेठेत काजू बीची अपेक्षित आवक झालेली नाही. व्यापाऱ्यांनी गत आठवड्यापासून काजू खरेदीला सुरुवात केली आहे. शुक्रवारच्या बाजारात बऱ्यापैकी काजू बीची आवक झाली. सुमारे दहा-बारा व्यापाऱ्यांनी काटे लावले होते. दिवसभरात सुमारे एक टन काजू बी जमा झाले.

गतवर्षी पर्जन्यमान कमी राहिल्याने काजूचा लाग कमी राहिला आहे. पहिला बहर पुरेसा झाला नसल्याचे शेतकरी सांगतात. त्यामुळे दुसऱ्या बहरावर शेतकऱ्यांची अपेक्षा टिकून आहे. पहिला बहर चांगला न झाल्याने उत्पादनात ५० टक्के घट होणार आहे. यंदा काजूचे पीक शेतकऱ्यांना हात देईल का नाही हे एप्रिलअखेरच्या टप्प्यात स्पष्ट होईल, असे कृषी अधिकारी विजयसिंह दळवी यांनी सांगितले.

काजूच्या दराबाबत शेतकऱ्यांमध्ये संभ्रम आहे. गत आठवड्यापासून प्रतिकिलो ९० रुपये दर राहिला आहे. पुढे दर वाढेल अशी अपेक्षा शेतकऱ्यांमध्ये आहे. कोकणात प्रतिकिलो दर १०५ रुपयांपर्यंत आहे. हा दर प्रतिकिलो १२० रुपयांपर्यंत जाईल, असे जाणकार सांगतात. आजरा, चंदगड परिसरातील स्थानिक काजू बीचा दर वाढल्यास बाजारपेठेत आवक वाढेल, असे व्यापाऱ्यांनी सांगितले.

वळीव पावसाची प्रतीक्षा

यंदा तालुक्यात वळीव पावसाने पाठ फिरविली आहे. मार्च महिना संपला तरी वळीव पाऊस झाला नाही. वळवाचा पाऊस झाल्यास काजूला चांगला बहर येऊन उत्पादन वाढण्यास मदत होईल. त्यामुळे शेतकऱ्यांना वळीव पावसाची प्रतीक्षा लागली आहे.