Rice Update : देशात तेलंगणा भात उत्पादनात महत्वाचे राज्य आहे. सध्या तेलंगणाला भातासाठी विशेष महत्व आले आहे. कारण शेजारील कर्नाटक, केरळ आणि तमिळनाडू ही राज्ये तेलंगणाकडून तांदूळ खेरदी करणार आहेत.

कर्नाटकातील काॅग्रेस सरकारला निवडणुकीच्या काळात दिलेले मोफत तांदळाचे आश्वासन पाळण्यासाठी महिन्याला दोन लाख टनांची गरज आहे. त्यासाठी तेलंगणातून तांदूळ खरेदीचा विचार कर्नाटक सरकार करत आहे.

कर्नाटकात काॅग्रेसने निवडणुकीच्या काळात मोफत तांदूळ देण्याची घोषणा केली होती. यासाठी अन्न भाग्य योजना राबविली जाणार आहे. या योजनेसाठी कर्नाटक सरकारला महिन्याला दोन लाख टनांपेक्षा जास्त तांदूळ लागणार आहे.

त्यामुळे कर्नाटकने तेलंगणा सरकारकडे मागणी केली, अशी माहिती तेलंगणाचे कृषिमंत्री सिंगीरेड्डी निरंजन रेड्डी यांनी दिली. सरकार यावर विचार करत असल्याचेही त्यांनी सांगितले.

तमिळनाडू सरकारनेही तेलंगणाकडे तीन लाख टन तांदळाची मागणी केली आहे. अर्ध उकडलेल्या तांदळाची खरेदी करण्याचीही तयारी तमिळनाडू सरकारने दर्शविली आहे.

तेलंगणात यंदा भात उत्पादनात मोठी वाढ झाली. राज्यातील भात उत्पादनात चार पटीने वाढ झाली आहे. यंदाच्या हंगामात २६० लाख टन भात उत्पादन झाले आहे. यातून १६० लाख टन तांदूळ मिळणार आहे.

राज्यातील भात लागवडही चार पटीने वाढून १२१ लाख एकरवर पोचली, असे तेलंगणा सरकारने म्हटले आहे. नुकत्याच संपलेल्या रबी हंगामात तेलंगणा सरकारने ६६ लाख टन भाताची खरेदी केली.

तांदळाला मागणी असली तरी तेलंगणापुढे अर्ध उकडलेल्या तांदळाचा प्रश्न कायम आहे. हा तांदूळ खरेदीसाठी राज्य सरकार केंद्राकडे पाठपुरावा करत आहे.

नुकतेच तेलंगणाचे उद्योगमंत्री के टी रामाराव केंद्रीय ग्राहक, अन्न आणि सार्वजनिक वितरण मंत्री पीयूष गोयल यांची भेट घेऊन अर्ध उकडलेल्या तांदळाची किमान २० लाख टन खरेदी करावी, अशी मागणी केली. तेलंगणा रबी हंगामात २३ लाख हेक्टरवर भात लागवड होते. हे क्षेत्र देशातील एकूण क्षेत्राच्या ५० टक्के आहे, असेही राव यांनी सांगितले.

केंद्र सरकारने केवळ भाताची खरेदी केल्यास तेलंगणा सरकारवर आर्थिक बोजा पडेल. त्यामुळे केंद्राने किमान १० लाख टन अर्धउकडलेला तांदूळ खरेदी करावा. त्यानंतर आमच्याकडे ३४ लाख टन तांदूळ असेल, असे राव यांनी गोयल यांना सांगितले.