Sindhudurg News : लांबलेला पाऊस, जुलैमध्ये झालेली अतिवृष्टी आणि पांढरी माशी, कोळेरोगांसह विविध कीड-रोगांचा प्रादुर्भाव यामुळे या वर्षी जिल्ह्यातील नारळ उत्पादनात ४० टक्क्यांनी घट झाली आहे. त्यामुळे आंबा, काजू, सुपारीपाठोपाठ सुरक्षित मानले जात असलेले नारळ पीकदेखील बदलत्या वातावरणाचा बळी ठरत असल्यामुळे उत्पादकांमध्ये चिंतेचे वातावरण आहे.

महाराष्ट्रात सर्वाधिक नारळ लागवड सिंधुदुर्ग जिल्ह्यात आहे. राज्यात ३३ हजार हेक्टरवर नारळ लागवड असून, त्यातील १८ हजार हेक्टर लागवड ही केवळ सिंधुदुर्ग जिल्ह्यात आहे. नारळ उत्पादन जिल्ह्याच्या सर्वच भागांत घेतले जात असले तरी वेंगुर्ला, कुडाळ, सावंतवाडी, मालवण या तालुक्यांत मोठ्या प्रमाणात लागवड आहे. येथील पोषक वातावरण आणि कीड-रोगांचा किमान प्रादुर्भाव यामुळे जिल्ह्यात गेल्या काही वर्षांत नारळ पिकांची लागवड वाढली आहे. परंतु हेच नारळ पीक आता बदलत्या वातावरणाचा बळी ठरत असल्याचे चित्र आहे.

गेल्या वर्षी ६ ते ७ जूनला सिंधुदुर्गात दाखल होणारा मॉन्सून १२ जूनला नावापुरताच हजर झाला. परंतु २३ जूनला तो सक्रिय झाला. जिल्ह्यात एप्रिल-मेमध्ये नारळाच्या झाडांना पुरेसे पाणी मिळत नाही. त्यातच मॉन्सून लांबला, तर दुसरीकडे जुलैमध्ये ५० टक्के पाऊस झाला. याचा विपरीत परिणाम नारळ पिकांवर झाला. एप्रिल ते जुलै अखेरपर्यंत नारळाला आलेल्या फुलोऱ्याचे उत्पादन निम्मेच आले आहे. या कालावधीत मोठ्या प्रमाणात फळगळ झाल्याचे शेतकऱ्यांकडून सांगण्यात येत आहे.

नारळाच्या झावळ्यांचा आकारदेखील या कालावधीत कमी झाल्याचे शेतकऱ्यांकडून सांगण्यात येत आहे. याशिवाय नारळावर पांढरी माशी, कोळेरोगाचा प्रादुर्भाव झाला आहे. त्यामुळे आतापर्यंत बदलत्या वातावरणापासून सुरक्षित मानले जाणारे नारळ पीकदेखील संकटात सापडले आहे. निम्मेच उत्पादन आल्यामुळे नारळ बागायतदारांना फटका बसला आहे.