Buldana News : स्थानिक कृषी उत्पन्न बाजार समितीत आवक होत असलेल्या मक्याला कमाल २१०० रुपयांचा दर मिळाला तर सरासरी दर २०७० रुपये राहिला. विदर्भात मलकापूर बाजार समिती मक्याच्या उलाढालीसाठी प्रसिद्ध मानली जाते.

या ठिकाणावरून हंगामात हजारो क्विंटल मक्याची खरेदी-विक्री होत असते. नवीन हंगामातील मका विक्रीला येणे अद्याप सुरू झालेले नाही. या बाजार समितीत गुरुवारी (ता. ७) सुमारे ४६८ क्विंटल मक्याची आवक झाली.

यापैकी २८ क्विंटल मका २१०० रुपये तर ४० क्विंटल मका १७०५ रुपये दराने विकला गेला. सरासरी २०७० रुपये दराने ४०० क्विंटल मक्याची विक्री झाली.

हरभऱ्याच्या आवकेत वाढ

सध्या या बाजारात हरभऱ्याची तीन हजार क्विंटलपेक्षा अधिक आवक सुरू आहे. या ठिकाणी हरभरा सरासरी ५२०० रुपयांपर्यंत प्रतिक्विंटलने विक्री होत आहे. कमाल दर ५४९० तर किमान दर ४८५० रुपयांपर्यंत आहे.

तुरीचीही दीड हजार क्विंटलपेक्षा जास्त आवक आहे. तुरीला येथे कमाल १० हजार ५५० आणि किमान ९ हजार १२५ रुपये दर मिळाला. सर्वाधिक माल सरासरी ९७०० रुपये दराने विक्री झाला.