कमी दाबाचे क्षेत्र, दक्षिणेकडे असलेला मॉन्सूनचा आस, किनारपट्टीला समांतर कमी दाबाचा पट्टा यासह पूरक प्रणालीमुळे आज (ता. १०) विदर्भातील गडचिरोली जिल्ह्यात मुसळधार पावसाचा रेड अलर्ट देण्यात आला आहे.

कोकणातील पालघर, रायगड, रत्नागिरी, मध्य महाराष्ट्रातील पुणे, सातारा जिल्ह्याचा घाटमाथा आणि विदर्भातील वर्धा, नागपूर, भंडारा, चंद्रपूर जिल्ह्यात जोरदार पावसाचा ‘ऑरेंज अलर्ट’ आहे. तर उर्वरित कोकण, मध्य महाराष्ट्र आणि तुरळक ठिकाणी विदर्भात जोरदार पावसाचा इशारा हवामान विभागाने वर्तविला आहे.

मॉन्सूनचा आस असलेल्या कमी दाबाचा पट्टा आणखी दक्षिणेकडे सरकला आहे. गुजरातच्या नालियापासून तीव्र कमी दाब क्षेत्राचे केंद्र ते पूर्व-मध्य बंगाल उपसागर ते उत्तर अंदमान समुद्रापर्यंत विस्तारला आहे.

गुजरात ते केरळ किनारपट्टीला समांतर कमी दाबाचा पट्टा आहे. महाराष्ट्राच्या मध्य भागात पूर्व-पश्‍चिम वाहणाऱ्या परस्पर विरोधी वाऱ्यांचे जोड क्षेत्र कायम आहे.