जालना : जनावरांतील लम्पी स्कीन आजाराच्या नियंत्रणासाठी (Lumpy Skin Disease Control) शासनाने दिलेल्या मार्गदर्शक सूचनांचे (Deadlines For Lumpy Control) काटेकोरपणे पालन करावे व रोगावर तत्काळ नियंत्रण मिळवावे, अशा सूचना जालना जिल्हा परिषदेच्या अतिरिक्त मुख्य कार्यकारी अधिकारी कल्पना क्षीरसागर यांनी अधिकाऱ्यांना दिल्या.

जालना जिल्ह्यातील खरपुडी येथील कृषी विज्ञान केंद्र आणि जिल्हा परिषदेचा पशू संवर्धन विभाग यांचे संयुक्त विद्यमाने जिल्ह्यातील पशुधन विकास अधिकारी, सहाय्यक पशुवैद्यकीय अधिकारी आणि पशुधन पर्यवेक्षक यांच्यासाठी बुधवारी (ता.७) ‘‘जनावरांचा लम्पी स्कीन आजार, नियंत्रण व उपचार तसेच ब्रुसेल्ला आजार लसीकरण, रोग निदान व प्रयोगशाळा महत्त्व’’ या विषयावर आयोजित एकदिवसीय प्रशिक्षणात प्रमुख अतिथी म्हणून त्या बोलत होत्या.

या प्रशिक्षणात जिल्ह्यातील एकूण ६३ अधिकारी व कर्मचाऱ्यांनी सहभाग घेतला. या कार्यक्रमाच्या अध्यक्षस्थानी कृषी विज्ञान केंद्राचे वरिष्ठ शास्त्रज्ञ एस. व्ही. सोनुने हे होते तर जिल्हा पशुसंवर्धन अधिकारी डॉ. दिगंबर कांबळे, सहायक आयुक्त डॉ. अमितकुमार दुबे, डॉ. प्रमोद कुमार यांची व्यासपीठावर उपस्थिती होती.