नाशिक : ग्रामीण भागात पशुपालन (Animal Husbandry) हा हमखास उत्पन्न देणारा व्यवसाय आहे. त्यामुळे गोवर्गीय जनावरांची संख्यादेखील मोठी आहे. वसुबारस सणाच्या (Vasubaras Festival) दिवशी गाय व वासराची पूजा करण्याची पद्धत ग्रामीण भागात रूढ आहे. याच दिवशी गोवर्गीय जनावरांना लम्पी स्कीन (Lumpy Skin) आजाराची लागण होऊ नये यासाठी जिल्ह्यातील सर्व ग्रामपंचायतींमध्ये एकाचवेळी गोठे, जनावरांचा वावर असलेला परिसर स्वच्छ करण्यात येणार आहे. संपूर्ण जिल्ह्यात एकाचवेळी स्वच्छता मोहीम राबवण्यात येणार असल्याने लम्पी स्कीन आजाराचा प्रादुर्भाव कमी होण्यासाठी प्रभावी ठरणार आहे, अशी माहिती जिल्हा पशुसंवर्धन अधिकारी डॉ. विष्णु गर्जे (Vishnu Garje) यांनी दिली.

जनावरांमधील लम्पी स्कीन हा आजार डास, कीटक, गोमाश्या, गोचिड यांच्या चाव्याने व बाधित जनावरांच्या प्रत्यक्ष संपर्काने होतो. त्यामुळे या आजाराच्या नियंत्रणासाठी गोठ्यांची साफसफाई, गोचिड, डास, बाह्य कीटकांचे निर्मूलन करण्याचे निर्देश मुख्य कार्यकारी अधिकारी आशिमा मित्तल यांच्या वतीने देण्यात आले होते. यालाच अनुसरून जिल्हा पशुसंवर्धन विभागाने एक विशेष मोहीम हाती घेतली असून दिवाळीपूर्वी वसुबारस सणाच्या दिवशी जिल्ह्यातील ग्रामपंचायतींत एकाचवेळी गोठे, जनावरांचा वावर असलेला परिसर स्वच्छ आणि निर्जंतुक करण्यात येणार आहे.

लम्पी स्कीन आजार डास, कीटक, गोमाश्या, गोचिड यांच्या चाव्याने होतो या कीटकांचा वावर हा सर्वत्र असतो एका ठिकाणी निर्जंतुकीकरण केल्यास त्याभागातून दुसऱ्या ठिकाणी कीटक, गोमाश्या, गोचिड यांचा प्रसार होण्याची शक्यता असते यासाठी ग्रामपंचायतींत स्वच्छता मोहीम राबवण्यात येणार आहे.

जनावरांचे ९३.८८ टक्के लसीकरण पूर्ण नाशिक जिल्ह्यात जनावरांमधील लम्पी स्कीन आजाराचा प्रादुर्भाव कमी करण्यासाठी जिल्हा परिषद पशुसंवर्धन विभागाच्या वतीने जिल्ह्यात सर्वत्र जनजागृतीपर कार्यक्रम आणि लसीकरण मोहीम यांसह प्रभावी उपाययोजना करण्यात येत आहेत. जिल्ह्यातील एकूण आठ लाख ९५ हजार पन्नास गोवर्गीय जनावरे असून यापैकी आठ लाख ४० हजार तीनशे ९३ जनावरांचे ९३.८८ टक्के लसीकरण पूर्ण झाले आहे.