नांदेड : जिल्ह्यातील काही तालुक्यातील गावांमध्ये लम्पी स्कीन आजाराचा (Lumpy Skin Disease) प्रादुर्भाव दिसून आल्याने ती गावे बाधित क्षेत्र म्हणून घोषित करण्यात आली आहेत. लम्पी आजारावर नियत्रंण (Lumpy Skin Control) व प्रतिबंध करण्यासाठी जिल्हा प्रशासनाच्यावतीने विविध उपाययोजना करण्यात येत आहेत.

जिल्ह्यातील पशुधनास लम्पी स्कीन आजारापासून संरक्षण मिळण्यासाठी १०० टक्के लसीकरण ३० सप्टेंबर पर्यत पूर्ण करण्याचे, निर्देश जिल्हाधिकारी खुशालसिंह परदेशी यांनी संबंधित यंत्रणेला दिले.

जिल्हाधिकारी परदेशी यांनी गुरुवारी (ता. २२) लिंबगाव येथे रोगप्रतिबंधक लसीकरण कॅम्पला भेट देवून पशुपालकांची विचारपूस केली. तसेच गोचीड, गोमाशापासून गोठे फवारणी करून घेण्याचेही त्यांनी आवाहन केले.

पशुधनामध्ये उद्भवलेल्या विषाणूजन्य लम्पी रोगाच्या संदर्भात पशुपालकांमध्ये भीती निर्माण होऊ नये म्हणून लसीकरणासाठी सर्व अधिकारी व कर्मचारी यांनी नेमून दिलेल्या ठिकाणी लसीकरण करण्यास प्राधान्य द्यावे, अशा सूचनाही त्यांनी दिल्या. लसीकरण प्रक्रियेत कोणीही दुर्लक्ष करता कामा नये अन्यथा त्याच्यावर योग्य ती कारवाई करण्यात येईल असा इशारा त्यांनी आढावा बैठकीत दिला.

जिल्ह्यातील १९ गावांतील ७१ जनावरे बाधित..

आजच्या स्थितीत नांदेड जिल्ह्यात एकूण १९ गावे बाधित झाली आहेत. या बाधित गावांतील पशुधन संख्या (गाय वर्ग) १० हजार १३८ एवढी आहे. यातील लम्पी बाधित पशुधन संख्या (गाय वर्ग) ७१ एवढी आहे. बाधित गावाच्या ५ किमी परिघातील गावांची संख्या १३८ एवढी झाली आहे. एकूण गावे (बाधित अधिक ५ किमी परीघ) १५७ गावातील पशुधनाची संख्या ही ४८ हजार २४९ एवढी आहे. यात बाधित व परिघाच्या गावातील पशुधनाची संख्या ५८ हजार ३८७ एवढी गणण्यात आली आहे.