Pune News : जिल्ह्यात ‘लम्पीच्या स्कीन’च्या आजाराने अडीच हजारांहून अधिक गोरवर्गीय पशुधन बाधित झाले आहे. त्या पैकी ९५ पशुधनाचा मृत्यू झाला आहे. आठ लाख ४६ हजार ७४५ पशुधनापैकी ८ लाख २५ हजार ६७६ पशुधनाचे (९७ टक्के) लसीकरण झाल्याचा दावा पशुसंवर्धन विभागाकडून करण्यात येत आहे. मात्र तरीही मृत्युमुखी पडणाऱ्या पशुधनाच्या संख्येत वाढ होत असल्याने पशुपालकांची चिंता वाढली आहे.

‘‘जिल्ह्यात आतापर्यंत दोन हजार ६८६ पशुधनाला ‘लम्पी’चा संसर्ग झाला आहे. त्यापैकी २ हजार १११ जनावरे बरी झाली आहेत. एप्रिलपासून आतापर्यंत ९५ जनावरे दगावली आहेत. त्यामध्ये २९ गाई, २२ बैल आणि ४३ वासरांचा समावेश आहे.

मृत झालेल्या एकूण पशुधनापैकी ८९ पशुधनाचे लसीकरण झाले होते’’, अशी माहिती जिल्हा परिषदेच्या पशुसंवर्धन अधिकारी डॉ. विष्णू गर्जे यांनी दिली.

‘लम्पी’च्या प्रादुर्भावामुळे दुधाळ पशुधनाचे दूध घटते. बाधित जनावरांना ताप येणे, भूक मंदावणे आदी लक्षणे दिसून येतात. वासरांमध्ये संसर्गाचे प्रमाण अधिक आहे. या आजारामुळे पशुधनाचा मृत्यू होत आहे. तसेच अनेक जनावरे अशक्त होत असल्याचे समोर आले आहे.

तातडीने उपचार करावेत

‘लम्पी स्कीन’ हा आजार टाळण्यासाठी गोठ्याची स्वच्छता, निर्जंतुकीकरण सातत्याने करणे गरजेचे आहे. तसेच पशुधनाच्या हालचालींवर लक्ष ठेऊन जनावर आजारी वाटल्यास तातडीने त्यास विलग करून औषधोपचार करावेत, असे आवाहन पशुसंवर्धन विभागाने केले आहे.