Sangli News : जिल्ह्यात जुलैपासून पुन्हा लम्पी स्कीन या त्वचा आजाराचा प्रादुर्भाव वाढू लागला आहे. आतापर्यंत गेल्या दोन महिन्यांत ३६०१ जनावरे या संसर्गजन्य विषाणूने बाधित झाली आहेत. त्यापैकी २३३ जनावरे या आजाराने दगावली आहेत. गो वंशीय जनावरांमधील आजाराचा प्रादुर्भाव रोखण्यासाठी त्यांचे शंभर टक्के लसीकरण करण्यात आले आहे.

जिल्ह्यात गतवर्षी लम्पी स्कीन आजाराची पहिली लाट आली होती. त्यानंतर लाट ओसरली होती. या काळात गो वंशीय जनावरांना तातडीने लसीकरण करण्यात आले होते. गाय, बैल, वासरू या गो वंशीय जनावरांची संख्या ३ लाख २४ हजार ७५६ इतकी आहे.

जुलैमध्ये पुन्हा एकदा लम्पी स्कीन आजाराचा प्रादुर्भाव होण्यास सुरुवात झाली आहे. दोन महिन्यांत ३६०१ जनावरांत आजाराचा प्रादुर्भाव झाला आहे. प्रादुर्भाव वाढू नये यासाठी लसीकरण सुरू करण्यात आले होते.

गेल्या आठवड्यात ६५ टक्के लसीकरण पूर्ण झाले होते. परंतु वाढत्या प्रादुर्भाव लक्षात घेऊन जिल्हा प्रशासनाने जनावरांना तातडीने लसीकरण करण्याची मोहीम रावबा, अशा सूचना पशुसंवर्धन विभागाला दिल्या होत्या. त्यामुळे पशुसंवर्धन विभागाने लसीकरण मोहीम राबवून शंभर टक्के लसीकरण केले.

जिल्ह्यात ३६०१ जनावरांना रोगाची लागण झाली असून त्यापैकी १७६८ जनावरे बरी झाली आहेत. १६०० जनावरांवर उपचार सुरू आहेत. तर २३३ जनावरे या आजाराने दगावली आहेत.

लम्पी स्कीनमुळे मृत्यू झालेल्या जनावरांना शासन आदेशानुसार मदत देण्यात येणार आहे. ज्या पशुपालकांची जनावरे दगावली आहेत. अशा पशुपालकांनी मदतीसाठी प्रस्ताव सादर केले आहेत, अशी माहिती पशुसंवर्धन विभागातून देण्यात आली.