कोल्हापूर : गेल्या चार दिवसांपासून जिल्ह्यात निरभ्र आकाश व ऊन असल्याने याचा सकारात्मक परिणाम ऊस तोडणीवर (Sugarcane Harvesting) झाला आहे. पावसाअभावी रखडलेली ऊसतोडणी वेगात सुरू झाली आहे. हंगाम सुरू केलेल्या बहुतांशी कारखान्याकडून रस्त्या कडेला असणाऱ्या उसाची तोड करण्यास प्राधान्य दिले जात असल्याचे चित्र आहे.

पाडव्याचा मुहूर्त साधत उर्वरित साखर कारखानदार गळीत हंगाम सुरू करण्याच्या तयारीत आहेत. शुक्रवारी (ता. २१) अनेक ठिकाणी अतिवृष्टी झाल्यानंतर शनिवारपासून जिल्ह्यात पूर्णपणे पावसाने विश्रांती घेतली आहे. पाऊस थांबल्या थांबल्या खडक ऊन पडत असल्याने जमिनी वाफसा स्थितीत लवकर येण्याच्या अशा पल्लवीत झाल्या आहेत.

याचा पहिला सकारात्मक परिणाम रखडलेल्या ऊस गळीत हंगामावर होणार आहे. चार दिवसांपासून सलग असणारे स्वच्छ हवामान ऊस तोडणी कामगारांसाठी स्वागतार्ह ठरले आहे. जे उसाचे प्लॉट पक्क्या रस्त्याच्या शेजारी आहेत जिथून वाहतुकीची गरज नाही अशा प्लॉटना कारखान्याकडून तोडणीसाठी प्राधान्य दिले जात आहे.

काही ठिकाणी अगदी शेवट शेवटी नंबर असणारा ऊस ही आता नाइलाजास्तव पहिल्यांदा तोडण्यात येत आहे. आणखी आठ दिवस सलग ऊन पडल्यास ऊस गळीत हंगामास नियमितपणे तोड पाळीप्रमाणे सुरुवात होईल, असे कारखाना प्रतिनिधींनी सांगितले. पावसामुळे रखडलेले ऊस गळीत हंगाम येत्या दोन दिवसात सुरू होऊन ऊस तोडणीस वेग येईल अशी शक्यता निर्माण झाली आहे.