Buldana News : मोताळा तालुक्यात दोन दिवसांपूर्वी अवकाळी पावसाने थैमान घातले. वादळी वारा व पावसामुळे आडविहीर येथे भिंत कोसळून दोन घरांचे नुकसान झाले. तर चार गावातील १९ हेक्टर क्षेत्रातील शेतीपिकांचे नुकसान झाल्याची माहिती आहे.

तालुक्यात बहुतांश ठिकाणी शुक्रवारी (ता. ७) सायंकाळी अवकाळी पावसाने हजेरी लावली. यावेळी सोसाट्याचा वारा, विजांचा कडकडाट व ढगांच्या गडगडाटासह जोरदार पाऊस झाला. त्यामुळे अनेक ठिकाणी शेतीपिकांचे नुकसान झाल्याचे सांगितले जाते.

वादळी वारा व पावसामुळे आडविहीर येथील अनिल हरी खाचणे यांच्या घराची भिंत कोसळल्यामुळे ५० ते ५५ हजार रुपयांचे नुकसान झाले. तर सुनीता संजय खाचणे यांच्या घराची पडझड होऊन ६० ते ६५ हजार रुपयांचे नुकसान झाले.

दरम्यान, तलाठी एन. एस. देवकर यांनी शनिवारी (ता. ८) सकाळी घटनास्थळी भेट देऊन पंचनामा केला.

वादळी वारा व अवकाळी पावसामुळे तालुक्यातील राजूर, खामखेड, खडकी, कोऱ्हाळा बाजार या परिसरातील ४२ शेतकऱ्यांच्या १९ हेक्टर क्षेत्रातील गहू, मका, कांदा, ज्वारी, भाजीपाला, करडई या पिकांचे नुकसान झाले.