Baramati News : एकीकडे कडक उन्हाळा, तर दुसरीकडे पाण्याची तीव्र टंचाई अशी परिस्थिती असली तर येणाऱ्या पावसाळ्यात व खरीप हंगामात शेतकऱ्यांना फायदा व्हावा म्हणून सध्या बारामती तालुक्याच्या जिरायती भागातील विहिरीतील गाळ काढणे, आडवे छिद्र पाडून पाण्याचे झरे खुले करणे, नैसर्गिक पाणीसाठ्याच्या ठिकाणातील गाळ काढण्याच्या कामांची लगबग शेतशिवारात सुरू झाली आहे.

यंदाच्या दुष्काळी परिस्थितीत पाण्याचा शाश्‍वत स्रोत करण्यासाठी पावसाच्या पाण्याचा थेंब शिवारात अडवून जिरविण्यासाठी जिरायती पट्ट्यातील शेतकरी उन्हाळ्यात कामे करत आहेत. कायमस्वरूपी सिंचनयोजना नसल्यामुळे शेतकऱ्यांना जास्तीत जास्त विहिरीच्या पाण्यावरच शेतीसिंचनाचा प्रश्न सोडवावा लागतो.

सध्या ५० ते २०० फुटांच्या अंतरावर विहिरीत आडवे छिद्र पाडून नैसर्गिक झरे खुले करून पाणी मिळविण्याचा प्रयत्न शेतकरी करीत आहेत. तर दुसरीकडे विहिरीतील साचलेला गाळ काढून पाणीसाठवणूक क्षमता वाढविणे व गाळाने बुजलेले नैसर्गिक झरे खुले करणे हे काम शेतकरी प्राधान्याने करीत आहेत.

त्यामुळे सध्या आधुनिक तंत्रज्ञान वापरून तयार केलेल्या गाळ काढण्याच्या मशिन, आडवे छिद्र पाडण्याच्या मशिन यांना सोन्याचे दिवस आले आहेत. पंधरा जून ते पंधरा जुलै हा खरीप हंगामातील पिकांच्या पेरणीचा हंगाम असतो. मात्र, दर वर्षी मे महिन्यात अवकाळी पावसाची हजेरी जिरायती भागात लागते.

त्यामुळे अवकाळी पावसापूर्वी व खरीप हंगामाच्या पूर्वी ही कामे करण्याचा शेतकऱ्यांचा प्रयत्न आहे. सध्या आर्थिक टंचाई असली तरी उसनवारी आणि कर्ज काढून विहिरीतील गाळ काढणे व जलस्रोत बळकट करण्यासाठी आवश्यक काम शिवारात व शेतात करून घेण्याकडे कल असल्याची माहिती मोरगाव येथील शेतकरी विकास तावरे, पिंटू तावरे, दिगंबर तावरे, तरडोली येथील शेतकरी विशाल पवार, विनायक गाडे, राजेंद्र वाघ यांनी दिली.