Nanded News : नांदेड तालुक्यातील ढोकी येथे सोयाबीन पिकासंदर्भात महिलांची विनाअनुदानित शेती शाळा घेण्यात आली. या वेळी महिलांना हवामान बदलामुळे सोयाबीन पिकावर होणाऱ्या परिणामांविषयी माहिती देण्यात आली. या शेतीशाळेत जिल्हा अधीक्षक कृषी अधिकारी दत्तकुमार कळसाईत उपस्थित होते.

या शेतीशाळेचे आयोजन नांदेड तालुका कृषी अधिकारी संजय चातरमल यांच्या मार्गदर्शनाखाली करण्यात आले. यात हवामान बदलामुळे सोयाबीन पिकावर होणाऱ्या परिणामांविषयी, तसेच कीड-रोग व्यवस्थापन या विषयी माहिती देण्यात आली. यात महिला आणि पुरुष शेतकरी दोन्ही सहभागी झाले होते.

या शेतीशाळेत एकात्मिक कीड व्यवस्थापन, आयसीएम विषयी निरीक्षणे दाखविण्यात आली. शेतकऱ्यांच्या शेतात जाऊन पीक परिसंस्थेचा अभ्यास केला. या अभ्यासात पिकांवरील कीड आणि रोगांचे निरीक्षण करण्यात आले. या निरीक्षणांवर गटांमध्ये सखोल चर्चा घडवून आणण्यात आली, ज्यामुळे शेतकऱ्यांनी एकमेकांचे अनुभव आणि ज्ञान वाटून घेतले. चर्चेअंती निष्कर्षांवर आधारित फवारणीविषयी योग्य मार्गदर्शन करण्यात आले.

सेंद्रिय कीटकनाशक निर्मितीबाबत माहिती देण्यात आली. निंबोळी अर्क आणि दशपर्णी अर्क यांसारखे घरगुती आणि सेंद्रिय कीटकनाशके कसे तयार करावेत, याबाबत प्रात्यक्षिकासह मार्गदर्शन करण्यात आले. हे कीटकनाशक पर्यावरणासाठी अनुकूल आहेत. ते रासायनिक फवारणीचा वापर कमी करण्यास मदत करतात.

या शेतीशाळेमध्ये शेतकरी गट आणि शेतकरी उत्पादक कंपनी स्थापना करणे, निंबोळी अर्क, दशपर्णी अर्क इत्यादी जैविक निविष्ठा तयार करण्यासाठी गावस्तरावर जैविक निविष्ठा केंद्र स्थापना करणे, ऊस पिकाचे पाचट व्यवस्थापन, फळबाग लागवड क्षेत्रात वाढ करणे, होस्ट फार्मरचे शेतावर पक्षिथांबे, पिवळे, निळे चिकट सापळे, जैविक निविष्ठाचा वापर, गावस्तरीय व्हॉट्सॲप ग्रुपमध्ये शेतकऱ्यांचा समावेश करणे,

शेतीचे आधुनिक तंत्रज्ञानासाठी महाविस्तार ॲप वापर करणे, पाणी फाउंडेशन डिजिटल शेती शाळाच लाभ घेणे आदीबाबत दत्तकुमार कळसाईत यांनी मार्गदर्शन केले. शेवटी, ‘पावसाची टाळी’ या सांघिक खेळाने शेतीशाळेची सांगता करण्यात आली, या वेळी नांदेड तालुका कृषी अधिकारी संजय चातरमल, मंडळ कृषी अधिकारी श्री. तवर, उपकृषी अधिकारी श्री. नागुरे, सहायक कृषी अधिकारी श्रीमती मोरताडे आदी उपस्थित होते.