Nashik News : नाशिक कृषी उत्पन्न बाजार समितीचे सभापती माजी खासदार देवीदास पिंगळे यांच्याविरोधात अविश्वास ठराव मंजूर झाल्यावर नवीन सभापती निवडीसाठी बुधवारी (ता. १९) सभा झाली. या वेळी समितीच्या ७३ वर्षांच्या इतिहासात प्रथमच सभापतिपदी महिलेची निवड झाली. सभापतिपदी कल्पना चुंभळे यांची बिनविरोध निवड करण्यात आली.

बुधवारी (ता. १९) बाजार समितीच्या प्रशासकीय इमारतीत सकाळी अकराला प्राधिकृत अधिकारी तथा उपजिल्हा निवडणूक अधिकारी, नाशिक डॉ. शशिकांत मंगरुळे यांच्या अध्यक्षेतखाली व बाजार समितीचे सचिव प्रकाश घोलप यांच्या उपस्थितीत सभापतिपदासाठी निवडणूक प्रक्रिया घेण्यात आली.

सभेस सर्व संचालक उपस्थित होते. सभा सुरू झाल्यानंतर काही वेळातच मावळते सभापती पिंगळे निवडणूक प्रक्रियेवर बहिष्कार टाकत उत्तम खांडबहाले आणि कड या दोन संचालकांसमवेत निघून गेले.

चुंभळे यांचे सभापतिपदासाठीचे तिन्ही अर्ज वैध झाले. दोन अर्ज मागे घेऊन एकच अर्ज आल्याने निवडणूक अधिकारी डॉ. मंगरुळे यांनी चुंभळे यांची बिनविरोध निवड जाहीर केली. संचालक शिवाजी चुंभळे, राजाराम धनवटे, प्रल्हाद काकड, धनाजी पाटील, तानाजी करंजकर या संचालकांसह पिंगळे गटातून निवडून आलेले ज्येष्ठ संचालक संपतराव सकाळे, उपसभापती विनायक माळेकर, युवराज कोठुळे, भास्कर गावित, जगनाथ कटाळे, सविता तुंगार, चंद्रकांत निकम, जगदीश अपसुंदे, संदीप पाटील आदींसह समर्थक उपस्थित होते.

सत्ताधाऱ्यांच्या घोषणा

गिरणारे, शिंदे, पळसे या उपबाजार समित्यांसाठी तरतूद

बाजार समिती परिसरातील स्वच्छतागृहांची दुरुस्ती, स्वच्छ पाण्याची व्यवस्था

हरसूल आणि त्र्यंबकेश्वर बाजारांचा विकास

पारदर्शक कारभार, बाजार समिती भ्रष्टाचारमुक्त करण्याचा निर्धार

नाशिक रोड मार्केटचा विस्तार

व्यापारी आणि ग्राहकांसाठी चांगल्या सुविधा निर्माण करणार

बाजार समितीवर आर्थिक भार टाकणारा खत प्रकल्प सर्वानुमते रद्द करण्याचा निर्णय

व्यापारी व महिलांसाठी भयमुक्त वातावरण निर्माण करणार

पेठ तालुक्यात नवीन मार्केट

आधुनिक सुविधांसह नाशिक बाजार समितीला जागतिक स्तरावर नेण्याचे लक्ष्य