Woman Killed Tiger Attack : मूल, जि. चंद्रपूर : तेंदूपाने गोळा करण्यासाठी आपल्या कुटुंबीयांसमवेत जंगलात गेलेल्या महिलेवर वाघाने हल्ला करून ठार केले. ही घटना सोमवारी (ता. १२) सकाळी आठ वाजताच्या दरम्यान भादुर्णी बिटाच्या कम्पार्टमेंट नंबर ७९३ मध्ये घडली. मृत महिलेचे नाव भूमिका दीपक भेंडारे (वय ३०) असे आहे. सलग दुसऱ्या दिवशी मूल तालुक्यात वाघाच्या हल्ल्यात महिला ठार झाल्याने खळबळ उडाली आहे.

तेंदूपानांचा हंगाम सुरू झाल्याने सर्वत्र संकलनाचे काम सुरू आहे. त्यासाठी जंगलाशेजारील गावांतील मजूर तेंदूपाने गोळा करण्यासाठी जंगलात जातात. भूमिका दीपक भेंडारे ही महिला पती, वडील, काका आणि काकू यांच्यासोबत जंगलात तेंदूपाने गोळा करण्यासाठी सकाळी गेली होती.

तेंदूपाने गोळा करीत असताना त्या ठिकाणी दबा धरून बसलेल्या वाघाने भूमिकावर हल्ला करून जागीच ठार केले. घटना घडलेले ठिकाण बफर झोनमध्ये येते. नियतक्षेत्र भादूर्णी बिटाच्या शिवापूर चक या परिसरात हा भाग येतो. भादूर्णी येथील पाच सहा मजूरच तेंदूपाने गोळा करण्यासाठी गेले होते. भूमिका ही आपल्या माहेरी आईवडिलांकडे पती सोबत राहत होती. या घटनेने भादुर्णीत हळहळ व्यक्त होत आहे.