Dharashiv News : पवन चक्की कंपन्यांकडून होणाऱ्या अन्यायाविरोधात पाच दिवसापासून तीन कार्यकर्त्यांनी जिल्हाधिकारी कार्यालयासमोर बेमुदत उपोषण सुरू केले होते. त्याची प्रशासनाने दखल घेतली नाही. यातच सोमवारी (ता. एक) तिघांची प्रकृती खालावली त्यानंतर शेतकऱ्यांसह विविध पक्ष संघटना व कार्यकर्ते आक्रमक झाले.

त्यांनी पाच तास तीव्र आंदोलन केले. जिल्हाधिकारी कार्यालयासमोरील रस्त्यावर रास्ता रोको आंदोलन केल्यानंतर कार्यालयात घुसण्याचा प्रयत्न केला. अचानक झालेल्या या घटनेमुळे जिल्हा प्रशासनाची धांदल उडाली. काही अधिकाऱ्यांनी समजूत घातल्यानंतर हे आंदोलन मागे घेण्यात आले.

आमदार कैलास पाटील यांच्यासह मनसे, वंचित बहुजन आघाडी, प्रहार संघटनेच्या पदाधिकाऱ्यांनीही आंदोलनात सहभाग घेतला. वाशी तालुक्यातील सेरेंटिका व रिन्युव्हल पॉवर कंपनीची पवनचक्क्की उभारणी, तसेच २२० केव्हीच्या लाइन, ३३ केव्ही पोललाइनची कामे सुरू आहेत. त्यासाठी या कंपन्यांनी कोणताही मोबदला दिलेला नसल्याची शेतकऱ्यांची तक्रार आहे. त्यातच दलाल, इतर गुंडांकडून धमकावून कामे करून घेतली जात असल्याचेही शेतकऱ्यांचे म्हणणे आहे.

शेतकऱ्यांच्या मागण्या पूर्ण करण्याचे कंपनीच्या प्रतिनिधींनी केवळ आश्‍वासनच दिले. याबाबत काहीच कार्यवाही केली नाही. उलट शेतकऱ्यांना त्रास देणे सुरू केले. यामुळे अगोदर शेतकऱ्यांच्या मागण्या पूर्ण करूनच प्रकल्पाचे काम सुरू करावे आदींसह विविध मागण्यांसाठी पाच दिवसापासून तीन कार्यकर्त्यांनी आंदोलन सुरु केले होते. मात्र त्याची दखल प्रशासनाने घेतली नाही. सोमवारी तिघांची प्रकृती खालावल्यानंतर कार्यकर्ते व शेतकरी आक्रमक झाले. त्यात विविध पक्ष व संघटनांचे पदाधिकारी व कार्यकर्तेही पुढे आले. सर्वांना आमदार पाटील यांचे पाठबळ मिळाले.

सर्वांनी जिल्हाधिकारी कार्यालयासमोर रास्ता रोको आंदोलन सुरू केले. तासाभरांनीही या आंदोलनाची दखल प्रशासनाने घेतली नाही. यामुळे चिडलेल्या शेतकरी व कार्यकर्त्यांनी कार्यालयाच्या आवारात घुसून मुख्य प्रवेशद्वाराचा ताबा घेतला. शेतकऱ्यांच्या मागण्या पूर्ण होईपर्यंत एकाही अधिकाऱ्याला कार्यालयातून बाहेर पडून देणार नाही, अशी भूमिका आंदोलकांनी घेतली.

पवन चक्की प्रकल्प बंद करण्याचे आदेश काढल्याशिवाय आंदोलन मागे घेणार नाही, असा पवित्रा त्यांनी घेतला. रात्री उशिरापर्यंत हे आंदोलन सुरूच होते. रात्री उशिरा अधिकाऱ्यांच्या आश्‍वासनानंतर ते मागे घेण्यात आले. रास्ता रोको दरम्यान आक्रमक झालेल्या शेतकरी महिलांनी मुख्यमंत्री देवेंद्र फडणवीस यांच्यासह तत्कालीन कृषिमंत्री माणिकराव कोकाटे यांच्याविरोधात आक्रोश केला.