Pune News : खडकवासला धरणात येणारे सांडपाणी रोखण्यासाठी महापालिका आणि पीएमआरडीए प्रशासन सरसावले आहे. धरणात येणारे सांडपाणी रोखण्यासाठी ‘एसटीपी’ अर्थात सांडपाणी शुद्धीकरण प्रकल्प उभारण्यात येणार आहेत, अशी माहिती महापालिका आयुक्त विक्रम कुमार यांनी दिली.

खडकवासला धरणापासून पानशेतपर्यंत धरणाच्या दोन्ही बाजूंना मोठ्या प्रमाणात व्यावसायिक बांधकामे तसेच नागरी वस्ती वाढली आहे. मात्र, त्यांचे सांडपाणी कोणतीही प्रक्रिया न करता थेट मुठा नदीत सोडले जाते. यामुळे खडकवासला धरण प्रदूषित झाले आहे. ही बाब लक्षात घेऊन राज्य शासनाच्या आदेशानुसार महापालिका आणि पीएमआरडीए यांनी संयुक्त पाऊल उचलले आहे.

खडकवासला धरणाच्या पाणलोट क्षेत्रात सुमारे २३ गावे येतात. या गावांची लोकसंख्या अल्प असली, तरी गावांच्या परिसरात मोठ्या प्रमाणात हॉटेल्स, बांधकामे झालेली आहेत. या बांधकामांनी सांडपाणी शुद्ध करूनच ते नदीत सोडणे अपेक्षित आहे. यासाठी खर्च जास्त असल्याने हे व्यावसायिक त्याची तसदी घेत नाहीत. त्यामुळे सांडपाणी थेट खडकवासला धरणात येते आहे.

तेथूनच पुणे (Pune) शहराला पाणीपुरवठा केला जात असल्याने प्रदूषित पाण्याचा धोका निर्माण झाला आहे. या पाण्याला अटकाव घालण्याची मागणी शासनाकडे वारंवार केली जात आहे. मात्र, ग्रामपंचायतींना ‘एसटीपी’ प्रकल्पासाठीचा खर्च परवडणारा नसल्याने दुर्लक्ष केले जाते. अन्यथा शासनाने निधी द्यावा, अशी मागणी होत आहे. त्यामुळे शासनाने महापालिका आणि पीएमआरडीए (PMRDA) यांना संयुक्त प्रकल्प राबवण्याचे आदेश दिले आहेत.