Pune News : पोकरा योजनेतील (नानाजी देशमुख कृषी संजीवनी योजना) अनियमितचे प्रकरण ताजे असतानाच आता राज्यातील कृषी विभागातील अनियमिततचे आणखी एक प्रकरण समोर आले आहे. या पार्श्वभूमीवर कीटकनाशके व इतर शेतमालाच्या साठ्यातील गैरव्यवहाराची प्रकरणे कायमस्वरूपी थांबविण्यासाठी अधिकाऱ्यांना विशेष प्रशिक्षण देण्यात येणार असल्याची माहिती राज्याचे कृषीमंत्री धनंजय मुंडे यांनी दिली आहे.

अकोला जिल्ह्यातील महामंडळाच्या विभागीय कार्यालयात कार्यरत असलेल्या वाशिमकर नावाच्या स्टोअर किपरच्या ताब्यात ३८ पोती कीटकनाशके सापडल्यानंतर त्यानंतर मुंडे यांनी हे वक्तव्य केले आहे. नागपूर येथे सुरू असलेल्या राज्य विधिमंडळाच्या हिवाळी अधिवेशनात एका प्रश्नाला उत्तर देताना मुंडे बोलत होते.

मुंडे म्हणाले की, महाराष्ट्र कृषी उद्योग विकास महामंडळाच्या माध्यमातून सरकार शेतकऱ्यांना लाभ देण्याचा प्रयत्न करत आहे. अकोला जिल्ह्यातील कीटकनाशकांच्या गैरव्यवहारातील आरोपी कर्मचाऱ्याला निलंबित करण्यात आले असून, यासंबंधी नेमलेल्या सत्यशोधक समितीच्या अहवालानुसार पुढील चौकशी सुरू आहे.

तसेच तसेच संबंधित कर्मचाऱ्यावर अकोला पोलिसात गुन्हा दाखल करण्यात आला आहे. भविष्यात असे गैरप्रकार घडू नयेत, यासाठी महामंडळाच्या अधिकाऱ्यांना आगामी काळात विशेष प्रशिक्षण देण्याचे नियोजन करण्यात येत असल्याचे मुंडे यांनी सांगितले.

पोकरा योजनेतही अनियमितता

महाराष्ट्रातील पोकरा योजनेतील अनियमितता समोर आली आहे. या प्रकरणी चुकीच्या पद्धतीने अनुदान घेतल्याचे समोर आले आहे. हे प्रकरणसुध्दा अकोला जिल्ह्यातीलच आहे.

अकोला जिल्ह्यातील पोकरा प्रकल्पांतर्गत कृषी अवजारे व ट्रॅक्टर वितरणात गैरव्यवहार झाल्याचे समोर आले आहे. अवजारे बँक घोटाळ्याची सखोल चौकशी करण्याचे आश्वासन राज्य सरकारने दिले आहे. दरम्यान, याच जिल्ह्यात कीटकनाशकांच्या गैरव्यवहाराचे प्रकरणही समोर आले आहे.