अॅग्रोवन वृत्तसेवा

जळगाव ः सामाजिक न्याय विभागातर्फे अनुसूचित जाती व नवबौद्ध घटकांच्या स्वतःच्या हक्काचे घर उभारणीच्या स्वप्नाला पूरक असलेल्या ‘रमाई घरकुल’ या अत्यंत महत्त्वाकांक्षी योजनेअंतर्गत जिल्ह्यात १ हजारांवर घरकुलांना मंजुरी मिळाली होती.

परंतु वर्षभरातही यासंबंधीची कार्यवाही संथ आहे. रमाई घरकुल योजना ही एक अत्यंत महत्त्वाची आणि महत्त्वाकांक्षी राज्य पुरस्कृत योजना असून ज्यांना निवासाची व्यवस्था नाही अशा सर्व आर्थिक दुर्बल असणाऱ्या व सर्वसामान्यांना नागरिकांना स्वतःच्या जागेवर राज्य सरकार पक्क्या स्वरूपाची घरबांधणीची व्यवस्था करून देत असल्याने ही योजना वरदान ठरत आहे.

या रमाई घरकुल योजनेत २०२३-२४ साठी जिल्ह्यासाठी ३ हजार ५६६ लाभार्थ्यांचे उद्दिष्ट होते. त्यापैकी १ हजारपेक्षा अधिक लाभार्थ्यांना मंजुरी मिळाली आहे. यामध्ये मातंग समाजातील व मातंग समाज वगळून इतर अनुसूचित जातीसाठी घरकुलांना मंजुरी देण्यात आली आहे.

मंजूर करण्यात आलेल्या अनुसूचित जाती व नवबौद्ध घटकांतील आर्थिक दुर्बल कुटुंबांचे स्वतःच्या हक्काच्या घराचे स्वप्न पूर्ण करण्यासाठी रमाई घरकुल योजनेच्या माध्यमातून पात्र असलेल्या प्रत्येकाला या योजनेचा लाभ देण्याचा प्रयत्न आहे, असे प्रशासनाने म्हटले आहे.

तालुकानिहाय मंजूर घरकुले

तालुका घरकुले

जळगाव १२७

धरणगाव ११७

अमळनेर ३२

चाळीसगाव २२६

पाचोरा २५

भडगाव ३८

एरंडोल ८१

पारोळा ४३१

भुसावळ ४९

जामनेर १४१

चोपडा ८०

मुक्ताईनगर २५२

बोदवड ११४

रावेर ९२

यावल ४०