Jalgaon News : खानदेशात खरिपात कलिंगड लागवडीसंबंधी शेतकऱ्यांत फारसा उत्साह नाही. रब्बी हंगामात कलिंगडाला रोगराईचा फटका बसला. दरही कमी मिळाले. यामुळे कलिंगड लागवड घटली आहे. खानदेशात उन्हाळ हंगामातील कलिंगडाची काढणी जूनमध्येही सुरू होती. परंतु उष्णतेचा फटका पिकास बसला. उत्पादन कमी आले.

कलिंगडाची लागवड रब्बीत खानदेशात आठ हजार हेक्टरवर झाली होती. अधिक आवकेची समस्याही रब्बीत होती. नुकसान झाल्याने खरिपात कलिंगड लागवड घटली आहे. पाऊसमान कमी राहील्याने लागवड झालेल्या पिकातील स्थिती बरी आहे. कारण पावसात कलिंगडाची हानी होते. मागील खरिपातही कलिंगड पिकात अतिपाऊस व किडींनी रोगराई आल्याने अतोनात हानी झाली होती.

एक ते दीड महिन्याचे पीक फळे लगडल्याच्या काळात हातचे गेले. कलिंगडाचा एकरी खर्च ६५ ते ७० हजार रुपये आहे. एवढा खर्च अनेकांचा वाया गेला. यानंतर रब्बीत लागवड वाढली. पण रोगराई व कमी दर, अशी समस्या आहे.

यामुळे अनेकांनी खरिपात लागवड टाळण्याचे नियोजन केले व लागवड घटल्याचे आता दिसत आहे. याचा परिणाम खते, मल्चिंग पेपर व बियाणे विक्रीवरही झाला आहे. कारण कलिंगडास खतांची अधिक गरज असते. दर चार दिवसाआड खते या पिकास दिली जातात.

लागवडीत ७० ते ८० टक्के घट

खानदेशात जुलै व ऑगस्टमध्ये खरिपातील लागवड केली जाते. तसेच लेट खरिपात सप्टेबरमध्ये काहींची लागवड केली जाते. ही लेट किंवा उशिराची लागवड असते. खरिपातील लागवडीत जळगाव जिल्ह्यातील जामनेर, चोपडा, यावल, धुळ्यातील शिरपूर, धुळे, नंदुरबारातील तळोदा व शहादा तालुका आघाडीवर असतो.

यंदा मात्र सर्वत्र लागवड घटत आहे. मागील खरिपात सुमारे दीड हजार हेक्टरवर खरिपात कलिंगड होते. यंदा सुमारे २०० ते ३०० हेक्टरवर खरिपात कलिंगड पीक घेतले जाईल, असे सांगितले जात आहे. यामुळे बियाणे पुरवठादारांतही उत्साह कमी दिसत आहे.