Chhatrapati Sambhajinagar News: मराठवाड्यातील ११ मोठ्या प्रकल्पांतील उपयुक्त पाणीसाठा ३४.६२ टक्क्यांवर आहे. त्यामध्ये जायकवाडी प्रकल्पातील उपयुक्त पाणीसाठा २९.७९ टक्क्यांवर असल्याची माहिती जलसंपदा विभागाकडून देण्यात आली.

जलसंपदा विभागाच्या माहितीनुसार, मराठवाड्यातील मोठ्या ११ प्रकल्पांपैकी निम्न दुधना प्रकल्पात ३६.६८ टक्के उपयुक्त पाणीसाठा शिल्लक आहे. याशिवाय येलदरी प्रकल्पात ५०.६१ टक्के, सिद्धेश्वरमध्ये २३.२७ टक्के, मांजरामध्ये २५.८५ टक्के, पेणगंगामध्ये ४३.०६ टक्के, मानारमध्ये ४१.६१टक्के,

निम्न तेरणामध्ये ६१.४८ टक्के, विष्णुपुरीत ७६.९१ टक्के, तर सीना कोळेगावमध्ये १८.१९ टक्के उपयुक्त पाणीसाठा शिल्लक आहे. मोठ्या प्रकल्पांपैकी सर्वांत कमी उपयुक्त पाणीसाठा माजलगाव प्रकल्पात केवळ ९.६२ टक्के शिल्लक असल्याची माहिती जलसंपदा विभागाकडून देण्यात आली.

मागील वर्षी आजच्या घडीला मराठवाड्यातील ११ मोठ्या प्रकल्पांत १५.७१ टक्के उपयुक्त पाणीसाठा शिल्लक होता. त्या तुलनेत दुप्पट पाणीसाठा आजच्या घडीला उपलब्ध आहे हे विशेष.