Sindhudurg News : गेले दोन महिने वाढलेले तापमान आणि या वर्षी बंधारे उभारण्यात झालेली कुचराई यामुळे जिल्ह्यातील ७४ गावांना पाणीटंचाईच्या झळा बसल्या आहेत. मालवण आणि कुडाळ तालुक्यांत टंचाईची तीव्रता अधिक जाणवत आहे.

जिल्ह्यात या वर्षी तुलनेने पाऊस कमी झाला. त्यानंतर ऑक्टोबरनंतर जिल्ह्यात पाऊस झालेला नाही. वनराई, मातिनाला बंधारे घालण्यात यावर्षी कुचराई झाली. याशिवाय दर वर्षीच्या तुलनेत या वर्षी गेले दोन महिने तापमानवाढ कायम राहिली. परिणामी विहिरी, तलाव, नद्यांच्या पाणीपातळीत घट झाली.

याचा मोठा परिणाम गावागावांना पाणीपुरवठा करणाऱ्या योजनांवर झाला आहे. एप्रिल आणि मे महिन्यांत जिल्ह्यातील ७४ गावांमध्ये पाणीटंचाई जाणवण्यास सुरुवात मे च्या पहिल्या आठवड्यात याची तीव्रता अधिक होती.

पाणीटंचाईची सर्वाधिक झळ मालवण तालुक्याला बसली. या तालुक्यातील ३३ गावांमध्ये पाणीटंचाई असून १० गावांमध्ये पाण्याचे दुर्भिक्ष्य आहे. कुडाळ तालुक्यातील दहा गावांमध्ये पाणीटंचाई जाणवत आहे.

दोडामार्ग तालुक्यातील ५ गावे, सावंतवाडीतील ८ गावे, कणकवलीतील ६ गावे, वैभववाडीतील ९ गावे, देवगड तालुक्यातील ३ गावांमध्ये पाणीटंचाईचे संकट आहे. जिल्हा परिषद प्रशासनाने पाणीटंचाई निवारण आराखडा तयार केला आहे. या गावातील पाणीटंचाई उपाययोजनांसाठी १ कोटी २४ लाख ५० हजार रुपयांची तरतूद करण्यात आली आहे.

काही गावांमध्ये कृत्रिम पाणीटंचाई

जिल्ह्यात काही गावांमध्ये पाण्याचे स्रोत आहेत. परंतु ढिसाळ नियोजनाअभावी लोकांना कृत्रिम पाणीटंचाईला सामोरे जावे लागत आहे. अशा गावांची संख्या देखील मोठी आहे.