Jalgaon News : जळगाव ः जिल्ह्यातील गिरणा पट्ट्यासाठी महत्त्वाचा मानल्या जाणाऱ्या गिरणा नदीवरील वरखेड लोंढे (ता.चाळीसगाव) येथील बॅऱेजचे पाणी सिंचनासाठी शिवारापर्यंत बंदीस्त पाईपलाईनद्वारे पोचविण्याचे काम सुरू आहे. पुढील वर्षभरात हे काम पूर्ण होईल, अशी अपेक्षा आहे.

तसेच भूसंपादनाचे कामही यंदा होईल आणि पुढे प्रकल्पात १०० टक्के जलसाठा राहील, अशीही अपेक्षा शेतकऱ्यांना आहे.  तत्कालीन युती सरकारने  २०१४ नंतर या प्रकल्पासाठी  पुरेसा निधी उपलब्ध करून दिला. या प्रकल्पाचे काम ९५ टक्के पूर्ण झाले आहे. त्याचे सात दरवाजे असून, सुमारे दीड हजार हेक्टर क्षेत्राला लाभ अपेक्षित आहे. त्यात चाळीसगाव, पाचोरा, भडगाव या तालुक्यांचा समावेश आहे.

शिवाय अनेक गावांची पाण्याची समस्यादेखील दूर होण्यास मदत होणार आहे. प्रकल्पाचे काम ९५ टक्के पूर्ण झाले, पण शिवारात पाणी पोचविण्यासाठी सुरवातीला कालव्याचे नियोजन केले आहे. त्यासाठी भूसंपादनाची प्रक्रियादेखील हाती घेण्यात आली होती. ही प्रक्रियाही गती घेत आहे.  शेतकरी व लोकप्रतिनिधी यांच्या मागणीनंतर पाणी बंदीस्त पाईपलाईनद्वारे शेतापर्यंत पोचविण्याचे कामही मागील वर्षाच्या अखेरीस सुरू झाले.

यामुळे सुपीक जमीन तशीच शेतकऱ्यांकडे  राहील व उत्पादनावरही परिणाम होणार नाही. भूसंपादनाची फारशी गरज या प्रकल्पासाठी नाही. परंतु जलसाठा १०० टक्के केल्यानंतर नदीकाठचे काही क्षेत्र बुडिताखाली येईल. त्यासाठी चाळीसगाव तालुक्यात काही भागात भूसंपादन करायचे आहे. बंदीस्त पाइपलाइनमुळे शासनाचाही सुमारे २०० कोटींवर खर्च वाचेल, असा मुद्दा उपस्थित करण्यात आला आहे. हे काम सध्या उंबरखेड व अन्य भागात सुरू आहे.

ज्या भागात काम सुरू आहे, तेथे रब्बीबाबत नुकसानीसंबंधी पंचनामे करून शेतकऱ्यांना भरपाईदेखील दिली जाणार आहे. जिल्ह्यात गिरीश महाजन यांच्या रूपाने जलसंपदामंत्रीपद आले आहे.  तापी पाटबंधारे महामंडळात त्यांनी मध्यंतरी प्रकल्पांबाबत चर्चाही केली. आढावा घेतला होता.  मध्यंतरी बैठकाही झाल्या. प्रकल्पासाठी पुढील निधी शासन देणार आहे. हा निधी उपलब्ध झाल्याने कामास गती आली. अंतिम मंजुरी जलसंपदा विभागाकडून मिळालेली आहे. मंजुरी मिळविण्यासाठी अंतिम अहवाल देखील तयार करून त्यावर मागील वर्षी गतीने कार्यवाही झाली.