Amravati News : तालुक्यातील मोथा गावात दूषित पाण्यामुळे साथरोगाची लागण झाली आहे. अशुद्ध पाणी प्यायल्याने गावातील २५ ते ३० नागरिक आजारी पडले असून त्यांच्यावर सोमवारपासून (ता. ५) उपचार सुरू आहेत. दुसरीकडे आरोग्य विभाग तसेच ग्रामीण पाणीपुरवठा विभागाच्या दाव्यांची पोलखोल यानिमित्ताने झाली आहे.

दरवर्षी चिखलदरा तालुक्यातील अनेक गावांमध्ये तीव्र पाणीटंचाई निर्माण होत असते. अनेक गावांना टँकरद्वारे पाणीपुरवठा करण्याची वेळ प्रशासनावर येते. ग्रामस्थांना गावाबाहेरून पाण्याची सोय करावी लागते, अशी परिस्थिती दरवर्षीच राहते.

यंदाही हीच परिस्थिती असून, मोथा गावात दूषित पाण्यामुळे जलजन्य आजार उद्‍भवला आहे. गावातील काही नागरिकांवर ग्रामीण रुग्णालयात उपचार सुरू आहेत, तर काहींनी खासगी रुग्णालयाची वाट धरली आहे.

सोमवारपासून (ता. ५) ११ रुग्ण चिखलदरा ग्रामीण रुग्णालयात उपचार घेत असल्याचे ग्रामीण रुग्णालय अधीक्षकांनी सांगितले. रुग्णांना संडास, उलटी, ताप, चक्कर येणे अशा प्रकारची लक्षणे आढळून आली आहेत. मोथा या गावाची लोकसंख्या पंधराशे ते सतराशेच्या घरात असून गटग्रामपंचायत आहे.

गावात पाण्याचे छोटे स्रोत आहेत. मात्र संबंधित विभागाने त्या पाण्याच्या स्रोतांमध्ये ब्लिचिंग पावडर वगैरे न टाकल्यामुळे साथरोगाची लागण झाली असावी, असा नागरिकांचा आरोप आहे. आरोग्य विभागाने आता तरी ही बाब गंभीरतेने घेत गावातील जलस्रोतांचे नमुने घेण्याची मागणी नागरिकांकडून होत आहे.