Buldana News : तालुक्यातील मंगरूळ नवघरे शिवारात कृषी विभागातर्फे लोकसहभागातून वनराई बंधारे उभारले जात आहेत. तूर पिकाला संरक्षित सिंचनाची सोय करण्यासाठी कृषी विभागाने श्रमदानातून वनराई बंधारे उभारण्याची महत्त्वाकांक्षी मोहीम हाती घेतलेली आहे.

मंगरूळ नवघरे येथे यंदा पडलेल्या अल्पशा पावसात सुद्धा जे नाले प्रवाहित आहेत, अशा नाल्यांवर वनराई बंधारे उभारण्याची मोहीम सुरु आहे. अर्जुन रामभाऊ डोके यांच्या शेतातील नाल्यामध्ये कृषी सहाय्यकाच्या मार्गदर्शनात श्रमदानातून वनराई बंधारा उभारण्यात आला.

यामध्ये या अडविलेल्या पाण्यामुळे किमान तीन ते चार हेक्टर क्षेत्रावर तुरीच्या पिकाला संरक्षित पाणी देता येईल. त्यामुळे तुरीच्या उत्पादनात निश्चित दहा ते पंधरा टक्क्यांपर्यंत वाढ होईल.

या प्रसंगी अर्जुन डोके, आत्माराम डोके, गणेश दांडेकर, राजू मोरे आदी शेतकरी उपस्थित होते. ज्या शेतकऱ्यांच्या शेतात प्रवाहित नाले असतील त्यांना श्रमदानातून वनराई बंधारे करावयाचे असल्यास त्यांना शास्त्रीय माहिती देण्यात येईल, असे आवाहन कृषी विभागामार्फत करण्यात आले.