Kolhapur Agriculture Flood Damage : कोल्हापूर जिल्ह्यात महापुरामुळे शिरोळ तालुक्यातील ४४ गावांना मोठा फटका बसला. तालुक्यात पंचनाम्याला सुरुवात झाली आहे, परंतु एका कृषी सहायकाकडे दोन ते तीन गावे असल्याने तालुक्यातील अनेक गावांमध्ये अद्याप पंचनाम्याला सुरुवातच झालेली नाही. त्यामुळे शेतकऱ्यांमध्ये नाराजी पसरली आहे.

५३ गावांपैंकी ४४ गावे पूरबाधित झाली असून, तहसीलदार अनिलकुमार हेळकर, गटविकास अधिकारी नारायण घोलप, तालुका कृषी अधिकारी चंद्रकांत जांगळे-पाटील यांच्या मार्गदर्शनाखाली पंचनामे सुरू आहेत.

परंतु, एका कृषी सहायकाकडे २ ते ३ गावे आहेत. अशात अनेक गावांत ग्रामसेवकांना ग्रामपंचायतीचे काम, घरांची पडझड, गोठे पडझडीची पाहणी करून पंचनामे करावे लागत आहेत.

तलाठ्यांना पूरग्रस्तांच्या भरपाईबाबतचा अहवाल व पंचनामे याचीही कामे आहेत. त्यामुळे तालुक्यातील अनेक गावांत अद्याप पंचनाम्याला सुरुवात झालेली नाही. नांदणी, धरणगुत्तीसह अनेक गावांना पंचनाम्याची प्रतीक्षा आहे. तालुका कृषी अधिकाऱ्यांनी जिल्हा कृषी अधीक्षकांकडे कृषी अधिकारी उपलब्ध करून देण्याची मागणी केली होती. मात्र, प्रशासनाकडून अद्यापही उपलब्ध झालेले नाहीत.