Cooperative Societies Election Kolhapur : मागच्या वर्षभरापासून प्रलंबीत राहिलेल्या सहकारी संस्थांच्या निवडणुकांची रणधुमाळी कोल्हापूर जिल्ह्यात पुढच्या दोन महिन्यात सुरू होणार आहे. पुढील १५ दिवसांत याबाबत जिल्हा उपनिबंधकांकडे सूचना येणार असल्याची माहिती समोर आली आहे. जिल्ह्यातील लहान, मोठ्या अशा २ हजार २०० संस्थाचा निवडणुक कार्यक्रम लागणार आहे. यामध्ये सर्वाधिक १६७० दूध व मत्स्य संस्थांचा समावेश आहे.

लोकसभेनंतर विधानसभेची आचारसंहिता लागल्याने सहकारी संस्थाच्या निवडणुका लांबणीवर पडल्या. यामध्ये शाहूवाडी तालुक्यातील सोनवडे-बांबवडे येथील उदयसिंगराव गायकवाड साखर कारखाना तर भुदरगड तालुक्यातील तांबाळे येथील इंदिरा महिला सहकारी साखर कारखान्यांची प्रक्रिया सुरू होणार आहे. याचबरोबर २ हजार २१५ संस्थांपैकी ५४५ संस्थांच्या निवडणुकात वर्षभरात पूर्ण झाल्या आहेत. उर्वरित १६७० संस्थांची प्रक्रिया आता राबवली जाणार आहे.

सहकारी संस्थांप्रमाणेच महापालिका, नगरपालिका, जिल्हा परिषद, पंचायत समिती या निवडणुकाही होण्याची शक्यता आहे. कोरोनामुळे पुढे ढकलेल्या अनेक निवडणुका प्रलंबीत आहेत. दरम्यान चार दिवसांपूर्वीच सहकारी निवडणूक प्राधिकरणाने राज्य शासनाकडे सहकारी संस्थांच्या निवडणुकीसाठी परवानगी मागितली आहे. त्यामुळे नवीन सरकार स्थापन झाल्यानंतर लगेचच ही प्रक्रिया सुरू होऊ शकते.

ग्रामीण भागात वातावरण तापणार

सहकारी संस्थाच्या निवडणुकांवर गावपातळीवरील राजकारण ठरत असते. ज्या गटाची सहकारी संस्थेवर पकड मजबूत असते त्या गटाचा गावपातळीवर जोर असतो. यामुळे दूध, विकास सेवा संस्था, पतसंस्थांच्या निवडणूका ताकदीने लढविल्या जातात. ग्रामपंचायतीप्रमाणे या संस्थांच्या निवडणुकांमध्ये इर्षा पहावयास मिळत असते. यामुळे पुढच्या ३ महिन्यात ग्रामीण भागात निवडणुकांचा धुरळा पहायला मिळणार आहे.