Pune News : ‘सकस अन्न, समृद्ध निसर्ग आणि आरोग्यपूर्ण समाज’ या संकल्पनेवर आधारित ‘१८ वा किर्लोस्कर वसुंधरा आंतरराष्ट्रीय चित्रपट महोत्सव’ ७ ते १० जानेवारी दरम्यान होणार असल्याची माहिती महोत्सवाचे संयोजक वीरेंद्र चित्राव यांनी पत्रकार परिषदेत दिली. महोत्सवादरम्यान ‘भारताचे मिलेट मॅन’ म्हणून ओळखले जाणारे पद्मश्री डॉ. खादर वली यांना वसुंधरा सन्मान पुरस्काराने गौरविण्यात येणार आहे.

ऑनलाइन पद्धतीने आयोजित या महोत्सवात रोज सकाळी ११ ते दुपारी २ या वेळेत चित्रपटांचे प्रक्षेपण होणार असून, पुनर्प्रक्षेपण सायंकाळी ७ ते रात्री १० या वेळेत होणार आहे, तसेच महोत्सवादरम्यान पद्मश्री डॉ. खादर वली यांना वसुंधरा सन्मान पुरस्काराने, तर पर्यावरण, हवामान बदल आणि ग्रामीण भारताच्या समस्यांबद्दल उल्लेखनीय कामगिरी करणाऱ्या पत्रकार निधी जामवाल यांना वसुंधरा मित्र पुरस्काराने गौरविण्यात येणार आहे.

पर्यावरणाशी निगडित चित्रपट प्रसारित करण्याबरोबरच तज्ज्ञांचे मार्गदर्शन व ‘बेस्ट ऑफ सेंच्युरी एशिया’ हे ऑनलाइन छायाचित्र प्रदर्शन महोत्सवाचे प्रमुख आकर्षण आहे.महोत्सवाच्या बोधचिन्हाचे प्रकाशन महोत्सवाचे निमंत्रक आरती किर्लोस्कर, अध्यक्ष राजेंद्र देशपांडे, आनंद चितळे यांच्या हस्ते करण्यात आले.

या वेळी आरती किर्लोस्कर म्हणाल्या, ‘‘चित्रपट प्रसारित करण्याबरोबरच वन्यजीवन, ऊर्जा, हवा, पाणी आणि पर्यावरण यांच्या अनुषंगाने चालणारे विविध उपक्रम व चित्रपट यांना स्थान देणारा हा महोत्सव आहे. निसर्गाला जाणून घेण्याचा आणि पर्यावरणाशी निगडित विविध प्रश्नांचा अभ्यास आणि विश्लेषण करण्याचा हा एक वेगळा प्रयत्न आहे.’’ हा महोत्सव सर्वांसाठी खुला असला, तरी या संकेतस्थळावर bit.ly/kviff२०२५ नावनोंदणी करणे आवश्यक आहे.