Hingoli News : वसमत हळद जीआय अधिकृत वापरकर्ता होण्यासाठी सातबारावर ई-पीक अॅपव्दारे हळद लागवडीची नोंद घेणे आवश्यक आहे. त्यासाठी शेतकऱ्यांमध्ये जागरूकता वाढवावी लागेल, असे प्रतिपादन नाबार्डचे (राष्ट्रीय कृषी व ग्रामीण विकास बँक) जिल्हा विकास अधिकारी अविनाश लहाने यांनी केले.

वसमत हळद जीआय मानांकन कामकाज आढावा व मार्गदर्शन समितीची बैठक शनिवारी (ता.१२) तेलगाव (ता.वसमत) येथील सूर्या फार्मर्स प्रोड्युसर्स कंपनीच्या कार्यालयात पार पडली. यावेळी श्री. लहाने अध्यक्षस्थानी होते. कंपनीचे अध्यक्ष प्रल्हाद बोरगड, हरिद्राचे संशोधन केंद्राचे पंकज कदम, शेतकरी प्रतिनिधी डॉ. हरिदास जटाळे आदी उपस्थित होते.

श्री. बोरगड म्हणाले, नाबार्डच्या सहकार्याने सूर्या फार्मर्स प्रोड्युसर कंपनी व कुरुंदकर फार्मर प्रोड्युसर कंपनी व पुढे वसमत येथील बाळासाहेब ठाकरे हरिद्रा (हळद) संशोधन केंद्राच्या माध्यमातून प्रयत्न केल्यामुळे जिल्ह्यातील हळदीला वसमत हळद हे भौगोलिक मानांकन (जीआय) मिळाले.

वसमत हळद ‘जीआय टॅग’चा अधिकृत वापर करता यावा म्हणून शेतकऱ्यांना प्रमाणपत्र देण्यासाठी नाबार्डने सूर्या फार्मर्स प्रोड्युसर कंपनीच्या माध्यमातून १ हजार शेतकऱ्यांना अधिकृत वापरकर्ता नोंदणी करण्याचे उद्दिष्ट देण्यात आले आहे. हा कार्यक्रम राबविण्यासाठी नाबार्डचे जिल्हा विकास अधिकारी लहाने यांच्या अध्यक्षतेत जी.आय कामकाज आढावा व मार्गदर्शन समिती स्थापना केली आहे.

या समितीच्या पहिल्या

बैठकीमध्ये ‘जीआय’चा अधिकृत वापरकर्ता होण्यासाठी वसमत हळद हा लोगो वापर ब्रॅण्डिंग करून आंतरराष्ट्रीय बाजारात हळद विकण्यासाठी शेतकऱ्यांनी ई-पीक अॅपव्दारे पाहणी करून सातबारावर हळद लागवडीची नोंद झाल्यानंतर शेतकऱ्यांनी ‘केवायसी’ कागदपत्रे, मोबाईल नंबर, दहा रुपये नोंदणी शुल्क सूर्या फार्मर्स प्रोड्युसर कंपनीकडे देऊन नोंदणी करावी.

प्रमाणपत्र मिळवावे. शासकीय योजनेचा लाभ मिळण्यासाठी ‘जीआय टॅग’चा वापर करून बाजारात हळदीला चांगला भाव मिळवण्यासाठी जास्तीत जास्त हळद उत्पादक शेतकऱ्यांनी या संधीचा लाभ घ्यावा असे आवाहन यावेळी करण्यात आले.