Wada News : तालुक्यात यंदा पावसाने मोठ्या प्रमाणात भातपिकाचे नुकसान केले आहे. हातातोंडाशी आलेला घास हिरावून घेतला. पावसाच्या भीतीमुळे शेतकऱ्यांनी लगबगीने कापणी करीत एका बाजूला घाईघाईने झोडणीलाही सुरुवात केली आहे.

ताडपत्रीचा आधार घेत अनेक शेतकरी भातझोडणी करीत आहेत. सतत पावसाची भीती शेतकऱ्यांना सतावत आहे. या भीतीपोटीच शेतखळे तयार न करता ताडपत्रीचा आधार घेत शेतकरी शेतातच झोडणी करीत असल्याचे दिसून येत आहे.

यंदा परतीच्या पावसामुळे उभे भातपीक शेतातच आडवे पडून फार दिवस पाण्यात राहिले. त्यामुळे भातपिकात पळींज जास्त प्रमाणात असून शेतकऱ्यांचे यात मोठे नुकसान झाले आहे.

पावसाचा काही नेम नसल्याने तो कधी पडू शकतो, या भीतीच्या सावटाखाली शेतकरी कायम आहे. जगाचा पोशिंदा असलेला शेतकरी घाईघाईने मिळेल, त्या वेळेत शेतातच ताडपत्रीच्या सहाय्याने झोडणी करीत असल्याचे दिसत आहे. झोडणीच्या काही नैसर्गिक नियमांना बगल देत शेतकऱ्यांनी झोडणी सुरू केली आहे.