Palghar News : डहाणू आणि तलासरी तालुक्यात सध्या भातझोडणीचे काम जोरात सुरू आहे. यात पारंपरिक पद्धती विसरून शेतकरी आता आधुनिक साधनांचा वापर करू लागला आहे.

यावर्षी अवकाळी पावसामुळे भात खराब झाल्याने शेतकरी आर्थिक अडचणीत सापडला. मात्र, त्यातूनही त्यांनी आपले उत्पादन वाचवण्याचा प्रयत्न सुरू केला असून भातझोडणीचे विविध उपाय अवलंब करत आहेत.

पूर्वी भातझोडणी करताना भाताचा भारा बांधून लाकडावर आपटला जायचा आणि बैलजोडी गोल फिरवून मळणी केली जायची. मात्र, आजकाल अनेक शेतकरी बैलजोड्यांचा वापर टाळून ट्रॅक्टर आणि पंख्याच्या साह्याने आधुनिक यंत्रांचा उपयोग करत आहेत.

या पद्धतीत भात आणि तूस वेगळे करण्यासाठी हवेचा प्रभावी वापर केला जातो. सध्या ट्रॅक्टरला पंखा जोडून भात आणि तूस वेगळे करण्याचे जुगाड शेतकऱ्यांमध्ये लोकप्रिय झाले आहे.

यावर्षी आलेल्या अवकाळी पावसामुळे भातपिकाचे मोठे नुकसान झाले आहे. अनेक ठिकाणी पिके आणि तयार भात खराब झाल्याने शेतकऱ्यांना आर्थिक फटका बसला आहे. त्यामुळे शेतकरी आपल्या पद्धतीत बदल करून उत्पादन वाचवण्याचा प्रयत्न करत आहेत.