Paddy Harvesting : सिंधुदुर्गात भातपीक कापणी अंतिम टप्प्यात

Sindhudurg News : सिंधुदुर्ग जिल्ह्यातील ६२ हजार हेक्टरपैकी ६० हजार हेक्टरवरील भातपीक कापणी पूर्ण झाली असून पुढील तीन ते चार दिवसांत उर्वरित भातपीक कापणी पूर्ण होण्याची शक्यता आहे. दरम्यान नाचणी पीक वेचणी देखील अंतिम टप्प्यात आहे.

जिल्ह्यात यावर्षी लांबलेल्या पावसामुळे ऑक्टोबरच्या दुसऱ्या आठवड्यापर्यंत भातपीक कापणीला सुरुवात झाली नव्हती.

त्यानंतर अखेरच्या आठवड्यात पावसाचा जोर कमी झाल्यानंतर भातपीक कापणीला सुरुवात झाली.सायंकाळच्या वेळेत सतत पाऊस पडत असल्यामुळे शेतकऱ्यांना बिनधास्त भातपीक कापणी करता येत नव्हती.

३ नोव्हेंबरनंतर पावसाने पूर्ण विश्रांती घेतली. त्यानंतर पीक कापणीला वेग आला. ३ नोव्हेंबर ते १३ नोव्हेंबरपर्यंत अधिकतर कापणी करण्यात आली. किरकोळ पीक कापणी शिल्लक असताना पुन्हा १४ नोव्हेंबर दरम्यान पावसाने व्यत्यय आणला.