Latur News : जिल्ह्यात ठिकठिकाणी गुरुवारी (ता. २०) ढगाळ वातावरण होते. त्यातच सायंकाळी वादळीवाऱ्यासह पावसाच्या सरी कोसळल्या. काही भागात शिडकावा झाला. जोरदार वाऱ्यामुळे अनेक भागात शेतशिवारातील पिके आडवी झाली, तर शेतातील कडबाही भिजला. शेतकऱ्यांनी कडबा तसेच काढणी केलेले पीक झाकण्यासाठी तारांबळ उडाली होती. काही भागात वाऱ्याचा कैऱ्यांनाही तडाखा बसला आहे.

उकाड्याने त्रस्त औसेकरांना दिलासा

औसाशहरात एकीकडे तापमानात वाढ झाल्याने नागरिक उकाड्यामुळे कमालीचे त्रस्त झाले होते. दरम्यान, गुरुवारी सायंकाळी अवकाळी पावसाची हजेरी लागल्याने उकाड्याने त्रस्त औसेकरांना दिलासा मिळाला. अचानक आलेल्या या पावसामुळे दुचाकीस्वारांची तारांबळ उडाली होती.

येरोळ परिसरात वाऱ्यासह पाऊस

येरोळ शिरूर अनंतपाळ तालुक्यातील येरोळ परिसरात गुरुवारी सायंकाळी साडेपाचला अचानक आलेल्या वादळीवाऱ्यासह पावसाने हजेरी लावली. या पावसामुळे शेतशिवारातील काढणी केलेली पिके, उघड्या बनमी झाकण्यासाठी शेतकऱ्यांची धावपळ झाली. वेगाच्या वादळी वाऱ्यामुळे शिवारातील ज्वारी, करडई, गहू अशी पिके आडवी पडली.

वाऱ्यामुळे शिवारातील आंब्यालाही फटका बसला, अनेक झाडांखाली कैऱ्यांचाही सडा पडला होता. तब्बल पाच मिनिटे वेगवान वारे व पंधरा मिनिटे पडलेल्या पावसामुळे शेतशिवारातील काढून ठेवलेल्या पिकांच्या बनमी उडाल्या, भिजल्या. पिके आडवी झाल्याने शेतकऱ्यांचे नुकसान झाले. याबाबत पंचनामे करून भरपाई द्यावी, अशी शेतकऱ्यांतून मागणी केली जात आहे.

जळकोट तालुक्यात पाऊस

दिवसभर उन्हाचा तडाखा बसत असताना गुरुवारी सायंकाळी वातावरणात बदल झाला. त्यात ढगही दाटून आले. काही भागात सायंकाळी सहा वाजता पावसाने हजेरी लावली. त्यामुळे काही वेळ वातावरणात गारवा पसरला होता. जळकोट तालुक्यातील वांजरवाडा, होकर्णा परिसरातील काही गावांत सायंकाळी सहा वाजता पावसाचा शिडकावा झाला.