Hirda Crop Damage : हिरडा झाड, फळ नुकसान भरपाईच्या कक्षेत आणावे

Pune News : हिरड्याचे झाड व फळ नुकसानभरपाईच्या कक्षेत आणावे यासाठी आंबेगाव तालुका कृषी कार्यालय यांनी ३ ऑक्टोबर २०२४ रोजी सदरील प्रस्ताव जिल्हा कृषी अधीक्षक यांना तयार करून पाठवलेला आहे.

या प्रस्तावावर जिल्हा कृषी अधीक्षक यांनी लवकरात लवकर निर्णय घ्यावा, अशा मागणीचे निवेदन किसान सभेने नुकतेच जिल्हा कृषी अधीक्षक यांच्या कार्यालयास सादर केलेले आहे, अशी माहिती किसान सभेचे डॉ. अमोल वाघमारे यांनी दिली.

हिरड्यासंदर्भात उपविभागीय अधिकारी गोविंद शिंदे यांच्या अध्यक्षतेखाली संघटनेच्या शिष्टमंडळासोबत झालेल्या बैठकीत, तालुका कृषी अधिकारी यांनी हिरड्याला नुकसान भरपाई कक्षेत घेण्यात आणावे यासाठी वरिष्ठ कार्यालयास प्रस्ताव पाठवावा असे ठरले होते. त्यानुसार हे प्रस्ताव देण्यात आला होता.

यामध्ये पुणे जिल्ह्यातील आंबेगाव, जुन्नर, खेड तालुक्यातील आदिवासी भागातील नागरिकांचे मुख्य उत्पन्नाचे साधन असलेले व नगद रक्कम प्राप्त करून देणारे बाळहिरडा हेच एकमेव साधन आहे. राज्यात जून २०२० च्या पहिल्या आठवड्यात झालेल्या, निसर्ग चक्रीवादळामुळे शेतीपिकांचे, फळबागांचे तसेच घरे व इतर घरगुती साहित्याचे मोठे नुकसान झालेले होते.

या वेळी आदिवासी समाजाचे मुख्य उत्पनाचे साधन असलेल्या बाळहिरडा या औषधी फळाचे ही, या वेळी मोठ्या प्रमाणात नुकसान झालेले होते. ही नुकसान भरपाई मिळावी म्हणून गेली चार वर्षे किसान सभेच्या नेतृत्वाखाली लढा उभा राहिला होता.

याचेच यश म्हणजे राज्य शासनाने अखेर ही नुकसान भरपाई शेतकरी बांधवांच्या खात्यावर जमा केली. ही नुकसान भरपाई विशेष बाब म्हणून देण्यात आलेली आहे. त्यामुळे हिरडा फळ व त्याचे झाड हे नुकसान भरपाईच्या कक्षेत शासनाने आणावे, यासाठी किसान सभेने आंदोलनाचे पत्र दिलेले होते. या वेळी किसान सभेच्या वतीने राजू घोडे, अशोक पेकारी, लक्ष्मण जोशी, आमोद गरुड, दत्ता गिरंगे, कृष्णा वडेकर, रामदास लोहकरे, सुभाष भोकटे, कमल बांबळे, अशोक जोशी आदी उपस्थित होते.