Jagdamba Devi Temple in Ahilyanagar : अहिल्यानगर जिल्ह्यातील श्री जगदंबा देवी मंदिरामध्ये दोन किलो वजनाचा सोन्याचा मुकुट सेवा संस्थेचे अध्यक्ष विजयराव देशमुख यांच्या हस्ते बसवण्यात आला. यावेळी विधिवत पूजा करण्यात आली. जगदंबा देवी सेवा संस्थांच्या वतीने प्राणप्रतिष्ठा कार्यक्रम संपन्न झाला. कर्जत तालुक्यातील राशीन येथील श्री जगदंबा देवी मंदिरामध्ये शतचिंडी महोत्सव सुरू आहे. या महोत्सवानिमित्त राशीनमध्ये सोन्याच्या मुकूटाची मिरवणूक काढण्यात आली.

अहिल्यानगर जिल्ह्यातीळ कर्जत तालुक्यात तेराशे वर्ष प्राचीन असणाऱ्या या मंदिराची विशेष ओळख आहे. देशाच्या दक्षिणेकडील राज्यांमध्ये प्राचीन देवीचं मंदिर अशी ओळख या मंदिराला आहे.

यावेळी श्री जगदंबा संस्थेचे अध्यक्ष विजयराव देशमुख म्हणाले, "राशीन येथील जगदंबा देवीचं मंदिर राज्यामध्ये प्रसिद्ध तीर्थक्षेत्र आहे. या मंदिराला मोठा इतिहास आहे. देशातील व राज्यातील अतिशय पुरातन व देखणे असं मंदिर आहे. स्वर्गीय बापूसाहेब देशमुख यांच्या पुढाकारातून सेवा संस्थेची स्थापना झाली."

यावेळी देशमुख यांनी मंदिरामधील सोहळ्याबद्दल माहिती दिली. ते म्हणाले, "आज मंदिरामध्ये सोन्याचा कळस आणि दोन किलो वजनाचा देवीचा सोन्याचा मुकुट प्राणप्रतिष्ठा कार्यक्रम संपन्न झाला. तसेच या निमित्ताने शतचंडी यज्ञ सोहळा सप्तशती पाठ यासह विविध कार्यक्रमाचे आयोजन करण्यात आले. या सर्व कार्यक्रमासाठी लाखोच्या संख्येने भाविकांनी येऊन दर्शन घेतलं." असंही देशमुख म्हणाले.

दरम्यान, या सोहळ्यासाठी हजारो नागरिकांनी उपस्थिती लावली. तसेच शतचिंडी यज्ञ सोहळा व सहस्त्र प्राकृतिक सप्तशती पाठ सोहळा यासाठी हजेरी लावली.