Pune News : आळेफाटा परिसरात बिबट्याच्या हल्ल्यात तीन शेळ्या व एक मेंढी ठार तर दोन शेळ्या जखमी झाल्याची घटना सोमवारी (ता. १६) घडली. आळेफाटा परिसरातील आळे, राजुरी, वडगाव कांदळी, जाधववाडी, बोरी बुद्रूक, कोळवाडी, संतवाडी, या गावांमध्ये दिवसेंदिवस बिबट्याचे पाळीव प्राण्यांवर हल्ले वाढतच चालले आहे.

वडगाव कांदळी येथील उत्तम पाचपुते यांच्या शेळ्यावर बिबट्याने हल्ला करून तीन शेळ्या ठार तर दोन शेळ्या जखमी केल्या आहेत. यामध्ये उत्तम पाचपुते यांचे ५० हजार रुपयांचे नुकसान झाले आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

दरम्यान‌ जाधववाडी या ठिकाणी जनार्दन पांडुरंग लोखंडे यांच्या शेतात बसलेल्या धनगरांच्या वाड्यावर सोमवारी सायंकाळच्या सुमारास बिबट्याने हल्ला करून एक मेंढी ठार केली.

या मळ्यात पाळीव प्राण्यांवर झालेली आठवड्यातील चौथी घटना असून येथील ग्रामस्थांमध्ये भीतीचे वातावरण निर्माण झाले आहे.

शेतात पाणी भरण्यासाठी जाण्यास भीती वाटत आहे. या परिसरात सध्या मोठ्या प्रमाणात बिबट्याचा वावर वाढला आहे या गोष्टीकडे लक्ष देऊन वनविभागाने पिंजरा लावण्यात यावा, अशी मागणी या परिसरातील शेतकऱ्यांनी केली आहे.