Washim News : श्रावण महिन्यात वाशीम-अकोला जिल्ह्याच्या सीमेवर विस्तारलेले काटेपूर्णा अभयारण्य सध्या पर्यटकांना आकर्षित करीत आहे. ७३.६९ वर्ग किलोमीटर क्षेत्रात पसरलेल्या विस्तीर्ण काटेपूर्णा अभयारण्यात पर्यटकांची मोठी गर्दी होत होताना दिसत आहे.

काटेपूर्णा प्रकल्पात बोटिंगचा आनंद घेण्यासाठी पर्यटक उत्सुक असतात. स्वातंत्र्य दिनापासून येथील बोटिंग सुरू करण्यात आली आहे. हा आनंद घेण्यासाठी पर्यटक एकच गर्दी करू लागले आहेत.

काटेपूर्णा अभयारण हे जैवविविधतेचे एक अद्भुत उदाहरण आहे. येथे असंख्य पक्षी, प्राणी आणि वनस्पतींच्या प्रजाती आढळून येतात. पर्यटकांना ट्रेकिंग, बर्ड वॉचिंग, वन्यजीवन निरीक्षण आणि फोटोग्राफीचा आनंद घेता येतो. अभयारण्यातील निरव शांतता आणि निसर्गाची सुंदरता पर्यटकांना भावते आहे. श्रावण महिन्यात येथील हवामानही पर्यटकांना आकर्षित करते. थंड हवा आणि हिरवळीने नटलेला निसर्ग पर्यटकांना एक वेगळा अनुभव देतो.

पर्यटनाच्या सुविधा

काटेपूर्णा जलाशयाच्या कडेला टेकडीवर नैसर्गिक निवास विकसित केले आहे. काटेपूर्णा जलाशयाच्या काठावरून फिरण्यासाठी निसर्ग वाट तयार केली आहे. यावर माहितीचे फलक लावले आहेत. अभयारण्यात फिरण्यासाठी जिप्सीची सुविधा आहे. रिव्हर व्ह्यू पॉइंट, चाका पॉइंट, पांडव लेणी, घारीचा आसोडा, कळंबाचा गवताळ प्रदेश, वाघाडोह या प्रदेशातून वन्यप्राण्यांचे दर्शन होते. या ठिकाणी काटेपूर्णा अभयारण्यातील जैवविविधतेची माहिती सचित्र रूपात दिलेली आहे. अलीकडेच या केंद्राचे नूतनीकरण करण्यात आले आहे. याशिवाय बालोद्यानही आकर्षणाचे केंद्र आहे.